मंगळवेढा / प्रतिनिधी : चार दिवसांपूर्वी सर्पदंशामुळे अत्यंत गंभीर अवस्थेत दाखल झालेल्या साठ वर्षीय रुग्णाला बेलदार हॉस्पिटलमधील डॉ. सचिन बेलदार आणि डॉ.अपेक्षा बेलदार यांच्या तत्पर आणि अथक प्रयत्नांमुळे नवजीवन मिळाले. या यशस्वी उपचारामुळे रुग्ण व त्याच्या नातेवाईकांनी डॉक्टरांचे आभार मानत त्यांचा सत्कार केला.
मिळालेल्या माहितीनुसार, संबंधित रुग्णाला रात्री सुमारे अकरा वाजण्याच्या सुमारास घरी असताना पायाला सर्पदंश झाला. त्यानंतर त्याला पोटात जळजळ होणे, तोंड कोरडे पडणे, चेहरा, हात व पायाला सूज येणे तसेच घाम येणे अशी लक्षणे दिसू लागली. प्रकृती झपाट्याने बिघडत असल्याने त्याला तातडीने मंगळवेढा येथील बेलदार हॉस्पिटलमध्ये मध्यरात्री बारा वाजण्याच्या सुमारास दाखल करण्यात आले.
दाखल होताना रुग्णाची अवस्था अत्यंत चिंताजनक होती. त्याचा रक्तदाब (बीपी) लागत नव्हता आणि काही वेळातच तो बेशुद्ध झाला. अशा गंभीर परिस्थितीत डॉ. सचिन बेलदार आणि डॉ. अपेक्षा बेलदार यांनी प्रसंगावधान राखत त्वरित उपचार सुरू केले. जवळजवळ दोन तासांच्या सततच्या प्रयत्नांनंतर रुग्णाचा रक्तदाब हळूहळू स्थिर होऊ लागला.
त्यानंतरही डॉक्टरांनी सातत्याने निरीक्षण व उपचार सुरू ठेवले. सुमारे २४ तासांनंतर रुग्ण शुद्धीवर येऊ लागला आणि पुढील दोन दिवसांत त्याच्या प्रकृतीत लक्षणीय सुधारणा झाली. अखेरीस चार दिवसांत रुग्ण पूर्णपणे बरा झाला असून काल त्याला रुग्णालयातून डिस्चार्ज देण्यात आला. या यशस्वी उपचारामुळे आनंदित झालेल्या रुग्णाच्या नातेवाईकांनी तसेच स्वतः रुग्णाने डॉ.सचिन बेलदार व डॉ. अपेक्षा बेलदार या दांपत्याचा सत्कार करून कृतज्ञता व्यक्त केली.
