मारोळी (प्रतिनिधी) : भोसे जिल्हा परिषद गटासाठी होत असलेल्या निवडणुकीच्या पार्श्वभूमीवर भारतीय जनता पक्षाचे उमेदवार प्रदीप खांडेकर यांच्या प्रचाराला वेग आला असून, मारोळी गावात झालेल्या प्रचारसभेला मतदारांचा उत्स्फूर्त प्रतिसाद लाभला. मोठ्या संख्येने उपस्थित राहिलेल्या ग्रामस्थांनी टाळ्यांच्या गजरात खांडेकर यांचे स्वागत केले.
या प्रचारसभेला विशेष महत्त्व प्राप्त झाले आहे, कारण खांडेकर यांच्याविरोधात निवडणूक लढवत असलेले तीर्थक्षेत्र विकास आघाडीचे उमेदवार बसवराज पाटील हे मारोळी गावचे भूमिपुत्र आहेत. त्यामुळे पाटील यांचे ‘होम ग्राउंड’ मानल्या जाणाऱ्या मारोळी गावात भाजपच्या सभेला मिळालेल्या प्रतिसादाने भोसे जिल्हा परिषद गटात राजकीय चर्चांना उधाण आले आहे. प्रचारसभेत बोलताना प्रदीप खांडेकर यांनी जिल्हा परिषद स्तरावर विकासकामांना गती देण्याचा निर्धार व्यक्त केला. रस्ते, पाणीपुरवठा, आरोग्य, शिक्षण तसेच ग्रामीण भागातील मूलभूत सुविधांच्या प्रश्नांकडे लक्ष वेधत त्यांनी विकास, पारदर्शकता आणि लोकसेवा हाच आपला अजेंडा असल्याचे सांगितले. केंद्र व राज्य सरकारच्या विविध योजनांचा लाभ सामान्य नागरिकांपर्यंत पोहोचवण्यासाठी आपण कटिबद्ध असल्याचेही त्यांनी स्पष्ट केले.
यावेळी स्थानिक भाजप पदाधिकारी, कार्यकर्ते तसेच ग्रामस्थ मोठ्या संख्येने उपस्थित होते. सभास्थळी नागरिकांनी आपल्या समस्या आणि अपेक्षा मांडल्या असता, त्या सोडवण्यासाठी सातत्याने आ. समाधान आवताडे यांच्या माध्यमातून पाठपुरावा केला जाईल, असे आश्वासन खांडेकर यांनी दिले. मारोळी गावात मिळालेल्या या प्रतिसादामुळे भाजप कार्यकर्त्यांमध्ये उत्साहाचे वातावरण आहे. राजकीय विश्लेषकांच्या मते, या सभेने गटातील समीकरणांवर परिणाम होण्याची शक्यता नाकारता येत नाही.
