भोसे/ प्रतिनिधी : भोसे (ता. मंगळवेढा) येथे भाजपला मोठे बळ मिळाले असून भोसे गावातील दत्ता ताटे यांचेसह शेकडो कार्यकर्त्यांनी भारतीय जनता पक्षात जाहीर प्रवेश केला. आगामी जिल्हा परिषद व पंचायत समिती निवडणुकांच्या पार्श्वभूमीवर हा प्रवेश भाजपसाठी महत्त्वाचा मानला जात आहे. भोसे जिल्हा परिषद गटातील भाजपचे उमेदवार प्रदीप खांडेकर तसेच पंचायत समिती गणाचे उमेदवार आप्पासो निकम यांना जाहीर पाठिंबा देत या कार्यकर्त्यांनी भाजपमध्ये प्रवेश केला. या प्रवेशामुळे भोसे गटात भाजपची संघटनात्मक ताकद मोठ्या प्रमाणात वाढली आहे.
हा पक्षप्रवेश कार्यक्रम मंगळवेढा नगरपालिकेचे नगरसेवक सोमनाथ आवताडे, तानाजी काकडे यांच्या मार्गदर्शनाखाली पार पडला. यावेळी बोलताना आवताडे यांनी भाजपच्या विकासाभिमुख धोरणांवर विश्वास व्यक्त करत, आमदार समाधान आवताडे यांच्या मार्गदर्शनाखाली विकासकामांमुळेच सर्वसामान्य कार्यकर्ते भाजपकडे आकर्षित होत आहेत, असे सांगितले.
प्रवेश केलेल्या कार्यकर्त्यांनी भाजपच्या माध्यमातून भोसे परिसराच्या सर्वांगीण विकासासाठी काम करण्याची इच्छा व्यक्त केली. रस्ते, पाणीपुरवठा, शेतीविषयक प्रश्न, युवकांना रोजगार आणि मूलभूत सुविधा या मुद्द्यांवर भाजपच प्रभावीपणे काम करू शकतो, असा विश्वास त्यांनी व्यक्त केला.
यावेळी उमेदवार प्रदीप खांडेकर व आप्पासो निकम यांनी सर्व नवप्रवेशित कार्यकर्त्यांचे स्वागत करत, भोसे गटाचा सर्वांगीण विकास हेच आमचे ध्येय असून, सर्वांना सोबत घेऊन प्रामाणिकपणे काम करू, असा शब्द दिला. या कार्यक्रमास भाजपचे पदाधिकारी, स्थानिक नेते व मोठ्या संख्येने ग्रामस्थ उपस्थित होते. भोसे गावातील या मोठ्या पक्षप्रवेशामुळे येणाऱ्या निवडणुकांमध्ये भाजपची स्थिती अधिक भक्कम झाल्याचे चित्र दिसत आहे.
