नंदेश्वर / विशेष प्रतिनिधी : भोसे जिल्हा परिषद गटातील भारतीय जनता पार्टीचे उमेदवार प्रदीप खांडेकर, पंचायत समिती गणाचे उमेदवार आप्पासो निकम यांना मंगळवेढा तालुक्याच्या दक्षिण भागातील मोठे नेते दादासाहेब दोलतडे यांनी बिनशर्त जाहीर पाठिंबा दिल्याने स्थानिक राजकारणात मोठी चर्चा रंगली आहे. विशेष म्हणजे दादासाहेब दोलतडे यांनी भोसे गटामधूनच राष्ट्रवादी काँग्रेस पक्षाच्या वतीने उमेदवारी अर्ज दाखल केलेला असतानाही विकासाच्या मुद्द्यावर भाजप उमेदवाराला पाठिंबा जाहीर केल्याने या निर्णयाला विशेष महत्त्व प्राप्त झाले आहे.
स्नेहमेळाव्याला समर्थकांची गर्दी
नंदेश्वर येथील माऊली पेट्रोलियम येथे दादासाहेब दोलतडे यांच्या उपस्थितीत स्नेहमेळाव्याचे आयोजन करण्यात आले होते. या स्नेहमेळाव्यास दोलतडे समर्थकांची मोठी गर्दी जमली होती. यावेळी जिल्हा परिषद गटाचे उमेदवार प्रदीप खांडेकर तसेच भोसे पंचायत समिती गणाचे उमेदवार आप्पासो निकम यांचा सत्कार करण्यात आला. उपस्थित सर्व कार्यकर्त्यांसमोर दोघांनाही जाहीर पाठिंबा देण्यात आला.
दादासाहेब दोलतडे यांच्या पाठिंब्याने आमची ताकद वाढली – प्रदीप खांडेकर
याप्रसंगी बोलताना प्रदीप खांडेकर म्हणाले, दादासाहेब दोलतडे यांनी विकासाच्या मुद्द्यावर माझ्यावर जो विश्वास दाखवला आहे, त्याबद्दल मी त्यांचा मनापासून आभारी आहे. यापुढे नंदेश्वर गावाचा आणि संपूर्ण परिसराचा सर्वांगीण विकास करण्यासाठी आम्ही दोघे मिळून प्रामाणिकपणे प्रयत्न करू. जनतेने दाखवलेला विश्वास कधीही तडा जाऊ देणार नाही. दादासाहेब दोलतडे यांच्या या पाठिंब्यामुळे भोसे जिल्हा परिषद गटात आमची ताकद अधिक वाढली असून, आगामी निवडणुकीत याचे सकारात्मक परिणाम दिसून येतील
आ. समाधान आवताडे यांचे विकासदृष्टी पाहूनच भाजपच्या उमेदवारांना पाठिंबा – गुरुलिंग दोलतडे
माजी ग्रा.पं.सदस्य गुरुलिंग दोलतडे यांनी आपल्या भाषणात आ. समाधान आवताडे यांच्या विकासदृष्टीचे विशेष कौतुक केले. ते म्हणाले, आ. समाधान आवताडे यांच्या नेतृत्वाखाली या भागात मोठ्या प्रमाणावर विकासकामे झाली आहेत. त्यांची दूरदृष्टी आणि विकासाभिमुख भूमिका पाहूनच दोलतडे गटाने भोसे जिल्हा परिषद गटातील भाजपच्या दोन्ही उमेदवारांना पाठिंबा देण्याचा निर्णय घेतला आहे. नंदेश्वर गावातून प्रदीप खांडेकर आणि आप्पासो निकम या दोन्ही उमेदवारांना मोठे मताधिक्य मिळेल, असा विश्वास आणि आशावाद मी व्यक्त करतो.
या स्नेहमेळाव्यास दामाजी सहकारी साखर कारखान्याचे संचालक भिवा दोलतडे, माजी पंचायत समिती सदस्य नितीन पाटील, शिरनांदगीचे सरपंच गुलाब थोरबोले, नंदेश्वरचे माजी सरपंच गेणा दोलतडे, उपसरपंच आनंदा पाटील, ग्रामपंचायत सदस्य तानाजी मोटे, माजी उपसरपंच राहुल कसबे, संतोष कांबळे यांच्यासह नंदेश्वर व परिसरातील अनेक ज्येष्ठ नेते, पदाधिकारी आणि कार्यकर्ते मोठ्या संख्येने उपस्थित होते.
