सोलापूर आजतक न्यूज नेटवर्क…
भोसे जिल्हा परिषद गटातील सर्वसाधारण आरक्षण जाहीर झाल्यापासून संपूर्ण मंगळवेढा तालुक्यात राजकीय चर्चांना उधाण आले असून, या गटातून दिग्गज नेते दादासाहेब दोलतडे निवडणूक लढविण्याच्या हालचाली करत असल्याची विश्वसनीय माहिती समोर येत आहे.
संभाव्य उमेदवारीची चर्चा..
सध्या या गटात आमदार समाधान आवताडे गट विरुद्ध महाविकास आघाडी अथवा समविचारी आघाडी अशी हाय व्होल्टेज लढत होणार असल्याचे संकेत मिळत आहेत. मात्र, आतापर्यंत कोणत्याही गटाकडून अधिकृत उमेदवार जाहीर करण्यात आलेला नाही. अशा परिस्थितीत राजकीय वर्तुळात दादासाहेब दोलतडे यांच्या संभाव्य उमेदवारीची चर्चा रंगत आहे.
दादासाहेब दोलतडे सशक्त, चाणाक्ष व्यक्तीमत्व..
दादासाहेब दोलतडे हे श्री बागडेबाबा दूध संस्थेचे चेअरमन असून, मंगळवेढा तालुक्याच्या दक्षिण भागातील एक सशक्त आणि अनुभवी नेतृत्व म्हणून ओळखले जातात. ते दामाजी कारखान्याचे संचालक भिवा दोलतडे आणि पंचायत समितीच्या माजी उपसभापती कै. इंदुबाई दोलतडे यांचे सुपुत्र आहेत. त्यांच्या परिवाराला गावपातळीपासून ते तालुकास्तरापर्यंत सशक्त राजकीय उपस्थिती आहे.
कोणाकडून लढणार हे अंतिम नसले तरी लढणार हे मात्र नक्की..
दादासाहेब दोलतडे स्वतः किंवा त्यांचे कनिष्ठ बंधू आणि नंदेश्वर गावचे माजी सरपंच गेणा दोलतडे यांचाही उमेदवारीसाठी विचार सुरू आहे. दोलतडे बंधू कोणत्या राजकीय गटाकडून निवडणूक लढविणार, हे अद्याप स्पष्ट झाले नसले तरी ते या निवडणुकीत सक्रियपणे उतरतील, हे जवळपास निश्चित मानले जात आहे. या पार्श्वभूमीवर भोसे जिल्हा परिषद गटात रंगणारी ही निवडणूक केवळ स्थानिकच नव्हे, तर तालुकास्तरीय राजकारणातही नवे समीकरण तयार करणारी ठरण्याची शक्यता वर्तवली जात आहे.
