नंदेश्वर / प्रतिनिधी : महाराष्ट्र लोकसेवा आयोग (MPSC) मार्फत घेण्यात आलेल्या परीक्षेत नंदेश्वर गावची भूमिपुत्री सोनाली जगन्नाथ दोलतडे हिने घवघवीत यश संपादन केले आहे. या परीक्षेत मुलींमधून संपूर्ण महाराष्ट्रात तिसरा क्रमांक, तर राज्यातून 39 वा क्रमांक मिळवत तिने उल्लेखनीय कामगिरी केली आहे.
या यशाच्या जोरावर सौ. सोनाली दोलतडे यांची राजपत्रित कृषी अधिकारी या प्रतिष्ठित पदावर निवड झाली आहे. ग्रामीण भागातून येऊन कठोर परिश्रम, चिकाटी आणि जिद्दीच्या जोरावर तिने हे यश मिळवले असून तिची ही कामगिरी अनेक तरुण-तरुणींसाठी प्रेरणादायी ठरणारी आहे.
तिच्या या यशाबद्दल नंदेश्वर गावासह परिसरात आनंदाचे वातावरण असून सर्व स्तरातून तिच्यावर अभिनंदनाचा वर्षाव होत आहे. सेवानिवृत्त सुभेदार बिरा दोलतडे, सामाजिक कार्यकर्त्या रुक्मिणी दोलतडे, तात्यासाहेब दोलतडे, देवा दोलतडे, ॲड. सुभाष शेजाळ, ॲड. वंदना शेजाळ, कॅप्टन पंकज दोलतडे यांचेसह नंदेश्वर तसेच परिसरात सोनाली दोलतडेच्या पुढील शासकीय सेवेसाठी आणि उज्ज्वल वाटचालीसाठी खूप खूप शुभेच्छा व्यक्त करण्यात येत आहेत.
