नंदेश्वर / प्रतिनिधी : मंगळवेढा तालुक्यातील सर्वाधिक लक्षवेधक ठरलेल्या भोसे जिल्हा परिषद गटाच्या निवडणुकीकडे संपूर्ण तालुक्याचे लक्ष लागून राहिले आहे. या गटात यंदा तिरंगी लढत पाहायला मिळाली. भाजपकडून प्रदीप खांडेकर, तीर्थक्षेत्र विकास आघाडी कडून बसवराज पाटील, तर वंचित बहुजन आघाडी कडून ॲड. बापूसाहेब मेटकरी यांनी निवडणूक रिंगणात उडी घेतली. मात्र प्रत्यक्ष प्रचार आणि मतदानाच्या प्रक्रियेत भाजपचे उमेदवार प्रदीप खांडेकर आणि तीर्थक्षेत्र विकास आघाडीचे उमेदवार बसवराज पाटील यांच्यातच मुख्य लढत रंगली असल्याचे चित्र स्पष्ट झाले आहे.
सात तारखेला प्रत्यक्ष मतदान प्रक्रिया पार पडल्यानंतर संपूर्ण भोसे गटात निकालाबाबत प्रचंड उत्सुकता निर्माण झाली आहे. मतदानानंतर लगेचच गावागावात, चौकाचौकात, टपऱ्यांवर, चहाच्या हॉटेलांवर अंदाज, दावे-प्रतिदावे सुरू झाले. या गावातून अमुक उमेदवाराला इतके मताधिक्य मिळेल, त्या गावात अमुक उमेदवार पिछाडीवर पडेल अशा प्रकारचे चर्चांचे फड रंगताना दिसत आहेत.
भोसे जिल्हा परिषद गटातील एकूण १६ गावांमध्ये मतदान झाले असून, बहुतांश गावांमध्ये लढत अत्यंत अटीतटीची झाल्याचे चित्र आहे. कोणत्याही एका उमेदवाराने स्पष्ट आघाडी घेतल्याचे संकेत अद्याप मिळत नसल्याने निकाल शेवटच्या फेरीपर्यंत गेला तर आश्चर्य वाटणार नाही, अशी चर्चा राजकीय वर्तुळात सुरू आहे. या निवडणुकीत जातीय समीकरणे महत्त्वाची ठरल्याची चर्चा जोर धरत आहे. विशेषतः मराठा समाजाची मते कोणाच्या पारड्यात अधिक प्रमाणात पडली आहेत, यावरच विजयाचे गणित अवलंबून असल्याचे बोलले जात आहे. लढत अधिक चुरशीची बनली असल्याचे मत राजकीय अभ्यासक व्यक्त करत आहेत.
दरम्यान वंचित बहुजन आघाडीचे उमेदवार बापूसाहेब मेटकरी यांना नेमकी किती मते मिळणार, याकडेही सर्वांचे लक्ष लागले आहे. थेट विजयाच्या शर्यतीत नसले तरी त्यांना मिळणारी मते निकालावर निर्णायक प्रभाव टाकू शकतात, अशी चर्चा आहे. दोन्ही प्रमुख उमेदवारांकडून विजयाचे दावे केले जात असल्यामुळे भोसे गटातील वातावरण अधिकच तापले आहे. निकाल जाहीर होईपर्यंत ही उत्सुकता कायम राहणार असून, भोसे जिल्हा परिषद गटाचा कौल कोणाच्या बाजूने लागतो याकडे संपूर्ण मंगळवेढा तालुक्याचे लक्ष लागले आहे.
