नंदेश्वर / प्रतिनिधी : मंगळवेढा तालुक्याच्या दक्षिण भागाचा ढाण्या वाघ म्हणून परिचित असणारे तसेच मंगळवेढा तालुका पंचायत समितीचे माजी उपसभापती दादासाहेब गरंडे यांचे दुर्दैवी निधन झाले. सोलापूर येथील अश्विनी रुग्णालयात त्यांच्यावर उपचार सुरू असताना त्यांनी अखेरचा श्वास घेतला. त्यांच्या निधनामुळे मंगळवेढा तालुक्याच्या राजकीय, सामाजिक क्षेत्रात मोठी पोकळी निर्माण झाली आहे.
दादासाहेब गरंडे हे मंगळवेढा तालुक्यातील मातब्बर आणि प्रभावी नेते म्हणून ओळखले जात होते. त्यांनी नंदेश्वर ग्रामपंचायतीवर पाच वर्षाचा अपवाद वगळता सलग 35 वर्षे वर्चस्व राखत नेतृत्व केले. याशिवाय भोसे जिल्हा परिषद गटावर सलग २५ वर्षे त्यांच्या मार्गदर्शनाखाली लोकप्रतिनिधी निवडून येत होते. कार्यकर्त्यांना सोबत घेऊन चालणारी त्यांची नेतृत्वशैली, स्पष्ट भूमिका आणि जनतेशी असलेला थेट संवाद यामुळे ते सर्वसामान्यांमध्ये विशेष लोकप्रिय होते.
त्यांच्या निधनाची बातमी समजताच मंगळवेढा तालुक्यासह नंदेश्वर परिसरात शोककळा पसरली आहे. विविध राजकीय पक्षांचे नेते, पदाधिकारी, कार्यकर्ते आणि नागरिकांनी त्यांना श्रद्धांजली अर्पण केली आहे. दादासाहेब गरंडे यांच्या निधनाने एक अनुभवी नेता हरपल्याची भावना सर्वत्र व्यक्त होत आहे.
