नंदेश्वर/ प्रतिनिधी
भोसे (ता.मंगळवेढा) येथील मुख्य चौकातील गैबी ओढ्यावरील पुलाचे रुंदीकरण करून पुलाची उंची वाढवण्याची आग्रही मागणी ग्रामस्थांच्या वतीने होत आहे. या मागणीची दखल घेत कार्यवाही न झाल्यास तीव्र प्रकारचे आंदोलन छेडले जाईल असा इशारा काँग्रेसचे तालुकाध्यक्ष प्रशांत साळे यांनी दिला आहे.
मंगळवेढा ते हुन्नूर रस्त्यावरील भोसे येथे बस थांबा शेजारी असणाऱ्या अरुंद ओढ्यावरील पुलाचे रुंदीकरण न करता रस्त्याचे काम चालू ठेवल्यामुळे रस्त्याची उंची वाढल्याने पुलावरील संरक्षक दगड रस्त्यात मुजल्याने मोठा धोका निर्माण झाल्याने ग्रामस्थातून तीव्र संताप व्यक्त होत असून सदर धोकादायक पुलाचे रुंदीकरण करूनच रस्त्याचे काम पूर्ण करावे अशी मागणी भोसे येथील ग्रामस्थातून होत आहे. मंगळवेढा ते हुन्नूर रस्त्यावरती भोसे बस थांब्या शेजारी असणाऱ्या मुख्य चौकातील गैबी ओढ्यावरती जुना पूल आहे या पुलावरील रस्ता मुळातच अरुंद असल्याने वाहनाची कोंडी होते.सध्या पाटकळ ते रेवेवाडी त्याचे काम प्रगतीपथावर आहे. पुलाचे खोदकाम करून व रुंदीकरण होणे अपेक्षित असताना आहे त्या पुलावरून रस्त्यावरती खडीकरणाचे तीन थर घेतल्यामुळे या पुलावरील संरक्षण दगड देखील रस्त्यात मोजून गेले असल्याने वाहनधारकांना मोठा धोका निर्माण झाला आहे. संरक्षण पुलावरील संरक्षक दगडच गायब झाल्याने मोठा अपघात होण्याची शक्यता नाकारता येत नाही. मागील २५ वर्षांपूर्वी या पुलावर टाकलेल्या पाईप गाळाने भरल्यानेपावसाळ्यात पाणी पाईप वाटे न जाता रस्त्यावरूनच वाहते त्यामुळे वाहतुकीस फार मोठा अडथळा निर्माण होत आहे.
चार वर्षांपूर्वी अरुंद पुलामुळे याच पुलावरून ट्रॅक्टर पलटी होऊन पाटकळ येथील युवकास जीव गमवावा लागला होता.
सदर रस्ता करीत असताना संबंधित विभागाने नंदेश्वर-हुन्नूर या गावातील मुख्य चौकात काँक्रीट रस्ता केला आहे. परंतु भोसे हे गाव मंगळवेढा तालुक्यातील सर्वात मोठे गाव असताना देखील चौकात काँक्रिट रस्ता न केल्यामुळे ग्रामस्थातून संताप व्यक्त होत आहे.रस्त्याची उंची वाढल्याने व मुळात धोकादायक असलेला हा पूल संरक्षक दगड गायब झाल्याने अधिकच धोकादायक बनल्याने या पुलाची उंची वाढवून व रस्त्याचे रुंदीकरण करून तसेच भोसे येथील मुख्य चौकात रस्ता कॉंक्रिटीकरण करूनच पुढील रस्त्याचे काम करावे अशी मागणी भोसे येथील ग्रामस्थातून होत आहे.
भोसे येथील मुख्य चौकातील ओढ्यावरील पूल मुळातच अतिशय धोकादायक आहे. आता तरी रस्त्याची उंची वाढल्याने संरक्षक दगड देखील गायब झाले असल्याने रस्ता अरुंद झाल्याने व रस्त्यावरती वळण असल्याने भविष्यात अपघाताची शक्यता नाकारता येत नाही. त्यामुळे संबंधित खात्यातील वरिष्ठ अधिकाऱ्यांनी त्वरित भोसे येथील पुलाचे काम करूनच व भोसे येथील मुख्यचौकातील काँक्रिटीकरण पूर्ण करूनच पुढील रस्त्याचे काम करावे अन्यथा तीव्र आंदोलन छेडले जाईल
प्रशांत साळे
अध्यक्ष मंगळवेढा तालुका काँग्रेस कमिटी
