नंदेश्वर / प्रतिनिधी : ब्रह्मांडनायक रा.रा. श्री. स.स. बाळकृष्ण महाराज (नंदेश्वर) आणि श्री. स.स. भाऊसाहेब महाराज (नंदेश्वर) यांच्या कृपाशीर्वादाने श्रीक्षेत्र नंदेश्वर येथे श्री. स.स. बाळकृष्ण महाराज यांच्या १२५ व्या जन्मोत्सवानिमित्त शतकोत्तर रौप्य महोत्सवी जन्मोत्सव सोहळ्याचे आयोजन करण्यात आले आहे. गुरुवार दि. १३ ऑगस्ट २०२६ ते शनिवार दि. ०५ सप्टेंबर २०२६ या कालावधीत विविध धार्मिक व आध्यात्मिक कार्यक्रमांचे आयोजन करण्यात आले असून, या सोहळ्यास राज्यभरातील भक्त भाविकांची मोठी उपस्थिती राहणार आहे.
सालाबादप्रमाणे आयोजित करण्यात आलेल्या श्रावण साधन सप्ताहात भक्तीविजय, एकनाथी भागवत, दासबोध, ज्ञानेश्वरी, मनाचे श्लोक, श्री बाळकृष्ण माऊली चरित्रामृत तसेच श्री बाळकृष्ण माऊली स्तवन स्त्रोत या पवित्र ग्रंथांचे पारायण करण्यात येणार आहे. या माध्यमातून भक्ती, साधना, नामस्मरण आणि संतसेवेचा संदेश भाविकांपर्यंत पोहोचविण्यात येणार आहे.
इंचगिरी ते नंदेश्वर पायी दिंडी
श्री. स.स. बाळकृष्ण महाराज यांच्या १२५ व्या जन्मोत्सवाचे औचित्य साधून मंगळवार दि. ०१ सप्टेंबर ते गुरुवार दि. ०३ सप्टेंबर २०२६ या कालावधीत श्रीक्षेत्र इंचगिरी ते श्रीक्षेत्र नंदेश्वर असा भव्य पायी दिंडी सोहळा आयोजित करण्यात आला आहे. दिंडीमध्ये गुरुबंधू-भगिनी, साधक, वारकरी व भक्त भाविक मोठ्या संख्येने सहभागी होणार असून, नामस्मरण व भक्तीमय वातावरणात हा सोहळा पार पडणार आहे.
हत्तीवरून माऊलीची भव्य मिरवणूक
शुक्रवार दि. ०४ सप्टेंबर २०२६ रोजी सायंकाळी ४ वाजता श्री माऊलींच्या पालखीची व प्रतिमेची हत्तीवरून भव्य मिरवणूक काढण्यात येणार आहे. या मिरवणुकीमुळे श्रीक्षेत्र नंदेश्वर नगरी भक्तिमय वातावरणाने भारावून जाणार असून, विविध ठिकाणी भाविकांकडून माऊलींचे दर्शन व स्वागत करण्यात येणार आहे.
यानंतर रात्री १२ वाजता श्री माऊली व भगवान श्रीकृष्ण यांचा जन्मोत्सव सोहळा मोठ्या भक्तिभावाने साजरा करण्यात येणार आहे. जन्मोत्सवाच्या वेळी मंदिर परिसरात नामघोष, भजन, कीर्तन व विविध धार्मिक विधींमुळे भक्तिमय वातावरण निर्माण होणार आहे.
पुष्पवृष्टीने होणार सोहळ्याची सांगता
शनिवार दि. ०५ सप्टेंबर २०२६ रोजी दुपारी १२ वाजता श्री माऊलींवर पुष्पवृष्टी करून या भव्य जन्मोत्सव सोहळ्याची सांगता करण्यात येणार आहे. या निमित्ताने दूरवरून येणाऱ्या भक्त भाविकांसाठी हा सोहळा आध्यात्मिक आनंदाची पर्वणी ठरणार आहे.
देवसागर साधक समाजाच्या वतीने सहभागी होण्याचे आवाहन
श्रीक्षेत्र नंदेश्वर येथे होणारा हा शतकोत्तर रौप्य महोत्सवी जन्मोत्सव सोहळा भक्ती, साधना, संतसेवा आणि गुरुसेवेची परंपरा अधिक दृढ करणारा ठरणार आहे. जीवनातील अत्यंत महत्त्वाच्या अशा या आध्यात्मिक पर्वणीचा लाभ घेण्यासाठी भाविकांनी मोठ्या संख्येने उपस्थित राहावे, तसेच गुरुबंधू-भगिनींनी भक्ती व संतसेवा करून आपले पारमार्थिक जीवन सफल करावे, असे आवाहन देवसागर साधक समाज (इंचगिरी संप्रदाय), श्रीक्षेत्र नंदेश्वर, ता. मंगळवेढा, जि. सोलापूर यांच्या वतीने करण्यात आले आहे.
