नंदेश्वर / प्रतिनिधी : मंगळवेढा तालुक्यातील नंदेश्वर येथे श्री सिद्धनाथ यात्रेनिमित्त विविध धार्मिक व सांस्कृतिक कार्यक्रमांचे आयोजन करण्यात आले असून यात्रेच्या पहिल्याच दिवशी भक्तिमय वातावरणात कार्यक्रमांना उत्साहात सुरुवात झाली. यात्रेच्या प्रारंभी श्री सिद्धनाथाच्या पालखीची भव्य मिरवणूक काढण्यात आली.
नंदेश्वर गावातील पारंपरिक पालखी मार्गावरून ही मिरवणूक निघाली. ढोल-ताशांचा गजर, सिद्धनाथाच्या नावानं चांगभलं या जयघोषात परिसर दुमदुमून गेला होता. या मिरवणुकीत महिला, पुरुष, युवक-युवती तसेच लहान मुलांनीही मोठ्या संख्येने सहभाग घेतला. भाविकांनी गुलालाची उधळण करत, फुलांचा वर्षाव करत पालखीचे भक्तिभावाने स्वागत केले.
पालखी मिरवणूक पार पडल्यावर मंदिर परिसरात श्री सिद्धनाथांची महाआरती करण्यात आली. या वेळी भाविकांनी मोठ्या श्रद्धेने उपस्थित राहून आरतीत सहभागी होत दर्शन घेतले. त्यानंतर सर्व भाविकांसाठी महाप्रसादाचे वाटप करण्यात आले.
यात्रेनिमित्त शुक्रवार दिनांक १७ रोजी मांसाहारी जेवणाचे आयोजन करण्यात आले आहे व तसेच यात्रेचे मुख्य आकर्षण असलेल्या लावण्यखणीत या महाराष्ट्रात गाजत असलेल्या सांस्कृतिक कार्यक्रमाचे आयोजनही शनिवार दिनांक 18 रोजी रात्री ठीक आठ वाजता करण्यात येणार असून परिसरात उत्सवाचे वातावरण निर्माण झाले आहे.
