सोलापूर आजतक न्यूज नेटवर्क…
सांगोला/तालुका प्रतिनिधी: सांगोल्यातील राजकीय वातावरण तापले असून, शेतकरी कामगार पक्षाचे युवा नेते डॉ.अनिकेत देशमुख यांनी शुक्रवारी आक्रमक भूमिका घेत सांगोल्यात जोरदार गर्जना केली. मी स्व.गणपतआबा देशमुख आणि विद्यमान आ. डॉ. बाबासाहेब देशमुख यांच्यासारखा मवाळ नाही. ज्यांच्यात हिंमत असेल त्यांनी उघडपणे विरोध करावा. आम्ही कुणाच्याही दबावाला घाबरणार नाही,” असा तीव्र इशारा त्यांनी दिला.
सांगोला कडकडीत बंद..
शुक्रवारी माजी आमदार स्व. गणपतराव देशमुख यांच्या घरावर समाजकंटकांनी केलेल्या हल्ल्याच्या पार्श्वभूमीवर सांगोल्यात बंदचे आवाहन करण्यात आले होते. शेतकरी कामगार पक्षाच्या नेतृत्वाखाली संपूर्ण सांगोला शहरात कडकडीत बंद पाळण्यात आला. बंदनंतर कार्यकर्त्यांना संबोधित करताना डॉ. अनिकेत देशमुख यांनी आपली ठाम भूमिका मांडली.
जशास तसे उत्तर मिळेल…
यावेळी बोलताना त्यांनी सांगितले की, “स्व. गणपतराव देशमुख यांचे संयमी राजकारण संपूर्ण महाराष्ट्राने पाहिले आहे. त्यांच्यानंतर चंद्रकांतदादा देशमुख आणि विद्यमान आमदार डॉ. बाबासाहेब देशमुख हेही शांत आणि संयमी स्वभावाचे आहेत. मात्र, आमच्या संयमाची परीक्षा पाहण्याचा प्रयत्न कोणी करू नये. आम्ही संयम ठेवतो म्हणजे आम्ही कमजोर आहोत असे समजू नका. जर आमच्या घरावर, आमच्या माणसांवर हात उगारला गेला, तर उत्तर देखील जशास तसे मिळेल. आम्ही कोण आहोत हे दाखवून देण्यासाठी फार वेळ लागणार नाही.
कार्यकर्त्यांनो निश्चिंत रहा..
शेवटी, त्यांनी सर्व कार्यकर्त्यांना आवाहन केले की, “शेतकरी कामगार पक्ष आणि आमच्या कुटुंबावर प्रेम करणाऱ्या प्रत्येक कार्यकर्त्याने यापुढे निश्चिंत राहावे. कारण मी स्व.गणपतआबा आणि आ.डॉ.बाबासाहेब देशमुख यांच्यासारख्या संयमी, मवाळ नाही. ज्यांना आम्हाला विरोध करायचा आहे त्यांनी आम्हाला उघड विरोध करावा त्यावेळी आम्ही दाखवून देऊ आम्ही काय आहोत.
