नंदेश्वर/ प्रतिनिधी : मंगळवेढा तालुक्यातील राजकीयदृष्ट्या अतिशय महत्त्वाचा मानला जाणारा भोसे जिल्हा परिषद गट अखेर तिरंगी लढतीचा साक्षीदार ठरणार असल्याचे चित्र स्पष्ट झाले आहे. आज उमेदवारी अर्ज माघारी घेण्याचा शेवटचा दिवस होता. या दिवशी उमेदवारांनी अर्ज मागे घेतल्याने उर्वरित तीन प्रमुख उमेदवारांमध्येच थेट लढत होणार असल्याचे निश्चित झाले आहे.
भोसे जिल्हा परिषद गटातून भारतीय जनता पक्षाकडून प्रदीप खांडेकर, तीर्थक्षेत्र विकास आघाडीकडून बसवराज पाटील, वंचित बहुजन आघाडीकडून ॲड. बापुसाहेब मेटकरी यांच्यात तिरंगी सामना रंगणार आहे. स्थानिक प्रश्न, विकासकामे आणि पक्षीय समीकरणांवर ही निवडणूक पार पडणार असल्याचे राजकीय जाणकारांचे मत आहे.
दरम्यान, भोसे पंचायत समिती गण आणि रड्डे पंचायत समिती गण या दोन्ही ठिकाणीही तिरंगी लढत होत असल्याने तालुक्यातील राजकीय वातावरण चांगलेच तापले आहे.
भोसे पंचायत समिती गणातून भाजपकडून आप्पासो निकम, काँग्रेसकडून प्रवीण मेटकरी, शिवसेनेकडून कर्मवीर आवताडे तर रड्डे पंचायत समिती गणातून भाजपकडून दत्तात्रय कांबळे, तीर्थक्षेत्र विकास आघाडीकडून सुरेश कांबळे, वंचित बहुजन आघाडीकडून साधू गेजगे हे उमेदवार निवडणूक रिंगणात उतरले आहेत.
या सर्व गटांमध्ये विविध पक्षांचे पारंपरिक मतदार, स्थानिक नेते, कार्यकर्त्यांची ताकद आणि उमेदवारांची वैयक्तिक संपर्कयंत्रणा निर्णायक ठरणार आहे. प्रचाराच्या रणधुमाळीला आता वेग आला असून, पुढील काही दिवसांत सभा, बैठका आणि प्रचारफेऱ्यांमुळे परिसरात राजकीय हालचाली अधिक तीव्र होण्याची शक्यता आहे.
