भोसे / विशेष प्रतिनिधी : मंगळवेढा तालुक्यातील भोसे जिल्हा परिषद गटात यावेळी निवडणुकीची लढत चांगलीच रंगतदार झाली असून, धनवान उमेदवारांच्या विरोधात सर्वसामान्य जनतेच्या जोरावर निवडणूक लढवणाऱ्या वंचित बहुजन आघाडीच्या उमेदवाराने दंड थोपटले आहेत. या गटात भाजपच्या वतीने माजी सभापती प्रदीप खांडेकर आणि दामाजी सहकारी साखर कारखान्याचे संचालक बसवराज पाटील हे दोन प्रभावशाली व आर्थिकदृष्ट्या सक्षम उमेदवार निवडणुकीच्या रिंगणात आहेत. त्यांच्या विरोधात वंचित बहुजन आघाडीच्या वतीने बहुजन गौरव प्रतिष्ठानचे अध्यक्ष ॲड. बापूसाहेब मेटकरी यांनी निवडणुकीत उडी घेतली आहे.
ॲड. बापूसाहेब मेटकरी हे सर्वसामान्य कुटुंबातून पुढे आलेले असून, एक निष्ठावान चळवळीतील कार्यकर्ता म्हणून त्यांची ओळख आहे. समाजातील वंचित, उपेक्षित आणि बहुजन घटकांसाठी सातत्याने लढा देणारे नेतृत्व म्हणून त्यांनी स्वतःची वेगळी ओळख निर्माण केली आहे. “समोर उभे असलेले दोन्ही उमेदवार धनवान आहेत. मात्र मी जनतेच्या जीवावर, जनतेच्या विश्वासावर आणि कार्यकर्त्यांच्या ताकदीवर ही निवडणूक लढवत आहे,” असे मत बापूसाहेब मेटकरी यांनी व्यक्त केले.
मंगळवेढा तालुक्यातील दुष्काळी परिस्थिती, विशेषतः २४ गावांच्या पाणीप्रश्नासाठी त्यांनी केलेला संघर्ष आजही नागरिकांच्या स्मरणात आहे. पाण्यासाठी रस्त्यावर उतरून आंदोलन करणे, प्रशासनाशी थेट संघर्ष करणे आणि शेतकरी व कष्टकऱ्यांच्या प्रश्नांना वाचा फोडणे, ही त्यांची ओळख बनली आहे. बहुजनांचा लढा हीच त्यांची भूमिका असून, सत्ता आणि पैशाच्या जोरावर नव्हे तर जनसामान्यांच्या प्रश्नांवर आधारित राजकारण करण्यावर त्यांचा ठाम विश्वास आहे.
सर्वसामान्य नागरिकांमध्ये मिसळून वागणारा, त्यांच्या सुख-दुःखात सहभागी होणारा आणि थेट संवाद साधणारा उमेदवार म्हणून बापूसाहेब मेटकरी यांना मोठ्या प्रमाणात पाठिंबा मिळताना दिसत आहे. जिल्हा परिषद ही विकासाची कणा आहे. इथे बसणारा प्रतिनिधी जनतेतून आलेला, जनतेसाठी झगडणारा असावा, अशी भावना व्यक्त करत ते मतदारांपर्यंत पोहोचत आहेत. भोसे जिल्हा परिषद गटातील ही निवडणूक केवळ दोन-तीन उमेदवारांमधील स्पर्धा नसून, धनशक्ती विरुद्ध जनशक्ती अशी खरी लढाई असल्याचे चित्र सध्या दिसून येत आहे. या लढतीत मतदार कोणाच्या पारड्यात कौल देतात, याकडे संपूर्ण तालुक्याचे लक्ष लागले आहे.
