(सोलापूर आजतक न्यूज नेटवर्क)
श्री बाळकृष्ण विद्यालय, नंदेश्वर येथे झालेल्या तालुकास्तरीय कबड्डी स्पर्धा उत्साहात आणि शिस्तबद्ध वातावरणात यशस्वीरित्या पार पडल्या. या स्पर्धेचे उद्घाटन श्री बाळकृष्ण माऊली मठाचे मठाधिपती बाळासाहेब महाराज यांच्या हस्ते दीपप्रज्वलन करून करण्यात आले. उद्घाटनप्रसंगी मंगळवेढा तालुक्याचे क्रीडाधिकारी दत्तात्रय वरकड, श्री बाळकृष्ण विद्यालयाचे प्राचार्य विठ्ठल एकमल्ली माजी उपसभापती दादासाहेब गरंडे, माजी उपसरपंच वसंत बंडगर, माजी सरपंच गेणा दोलतडे, युवक नेते वसंत गरंडे, बाळकृष्ण माऊली सामाजिक संस्थेचे अध्यक्ष गुरुलिंग दोलतडे, आप्पासाहेब मेटकरी, ग्रामपंचायत सदस्य तानाजी मोटे, भगवान गरंडे, बबलू गरंडे यांची उपस्थिती लाभली. श्री बाळकृष्ण विद्यालय व जुनिअर कॉलेजचे सर्व सहशिक्षक, विद्यार्थी व ग्रामस्थ मोठ्या संख्येने उपस्थित होते.स्पर्धेचे सामने अत्यंत चुरशीचे झाले. यामध्ये वेगवेगळ्या वयोगटातील विद्यार्थ्यांनी उत्कृष्ट कौशल्य दाखवत प्रेक्षकांची मने जिंकली.
स्पर्धेचे निकाल पुढीलप्रमाणे:
🔹 १४ वर्षांखालील वयोगट (मुले):
अंतिम सामना श्री बाळकृष्ण विद्यालय, नंदेश्वर आणि बाळकृष्ण विद्यालय, भाळवणी यांच्यात झाला. नंदेश्वर विद्यालयाने दोन गुणांच्या फरकाने विजय मिळवत प्रथम क्रमांक पटकावला.
🔹 १७ वर्षांखालील वयोगट (मुले):
या गटात शारदा सिद्धनाथ विद्यामंदिर, पाटखळ आणि माचनूर यांच्यात अंतिम सामना झाला. पाटखळ विद्यालयाने उत्कृष्ट खेळ करत प्रथम क्रमांक मिळवला.
🔹 १९ वर्षांखालील वयोगट (मुले):
या गटातील अंतिम सामना श्री बाळकृष्ण विद्यालय, नंदेश्वर व माध्यमिक आश्रम शाळा, खवे यांच्यामध्ये होणार होता. मात्र, पावसाच्या अडथळ्यामुळे सामना पुढे ढकलण्यात आला असून तो २७ सप्टेंबर रोजी मंगळवेढा येथील क्रीडा संकुलात होणार आहे.
या स्पर्धांमुळे ग्रामीण भागातील खेळाडूंना आपली कौशल्ये सादर करण्याची संधी मिळाली. स्पर्धेच्या यशस्वी आयोजनाबद्दल श्री बाळकृष्ण विद्यालयाच्या व्यवस्थापन, प्राचार्य, क्रीडा शिक्षकांचे कौतुक होत आहे.
सर्व यशस्वी विद्यार्थ्यांना घडवण्यासाठी क्रीडाशिक्षक मनोहर बंडगर, नवनाथ मेटकरी, सहकारी मार्गदर्शक शिक्षक पवनकुमार पाडवी, किरण नागणे, गिरजाप्पा चौगुले यांनी विशेष परिश्रम घेतले. यावेळी बाळकृष्ण विद्यालय कनिष्ठ महाविद्यालयाचे प्राचार्य विठ्ठल एकमल्ली, शिक्षक शिक्षकेतर कर्मचारी नंदेश्वर मधील ग्रामस्थ यांनी यशस्वी विद्यार्थ्यांचे अभिनंदन करून कौतुक केले.
