(टीम सोलापूर आजतक) महाराष्ट्र राज्य शाळा कृती समितीच्या माध्यमातून प्रतिवर्षी दिला जाणारा कृतिशील शाळा पुरस्कार यंदाचे वर्षी श्री संत चोखोबा शिक्षण प्रसारक मंडळ हुन्नूर संचलित प्राथमिक व माध्यमिक आश्रम शाळा हुन्नूर तालुका मंगळवेढा या प्रशालेस मिळाला आहे.
महाराष्ट्र राज्य शाळा कृती समितीमार्फत दरवर्षी वेगवेगळ्या क्षेत्रात उल्लेखनीय कार्य केलेल्या शाळांना कृतिशील शाळा पुरस्काराने सन्मानित करून प्रोत्साहन देण्यात येते. पुणे विभागाचे माजी विधान परिषद सदस्य व महाराष्ट्र राज्य शाळा कृती समितीचे प्रदेश सचिव दत्तात्रय सावंत यांनी यंदा प्राथमिक व माध्यमिक आश्रम शाळा हुन्नूर या प्रशालेने मुख्यमंत्री माझी शाळा सुंदर शाळा या उपक्रमात सहभागी होऊन प्रशालेत विविध उपक्रम राबविल्याबद्दल सदर कार्याची दखल घेऊन प्राथमिक व माध्यमिक आश्रम शाळा हुन्नूर या प्रशालेची कृतिशील शाळा म्हणून निवड झाल्याचे पत्र प्रशालेस दिले आहे.
श्री संत चोखोबा शिक्षण प्रसारक मंडळाचे अध्यक्ष प्रशांत साळे व संस्थेच्या मार्गदर्शिका पूर्वी साळे यांनी संस्थेच्या व शाळेच्या कामाची महाराष्ट्र राज्य शाळा कृती समितीने दखल घेऊन शाळेस पुरस्कार दिल्याबद्दल महाराष्ट्र राज्य शाळा कृती समितीचे व माजी आमदार दत्तात्रय सावंत सर यांचे आभार मानून प्रशालेचे मुख्याध्यापक व सर्व शिक्षक शिक्षकेतर कर्मचाऱ्यांचे अभिनंदन केले. सदर पुरस्काराचे वितरण रविवार दिनांक 1 डिसेंबर 2024 रोजी सिंहगड कॉलेज कोर्टी येथे सकाळी 10.30 वाजता होणार आहे.
