सोलापूर आजतक न्यूज नेटवर्क:
सोलापूर जिल्ह्यातील बार्शी तालुक्याच्या सासुरे कलाकेंद्रासमोर बीड जिल्ह्यातील एका उपसरपंचाने डोक्यात गोळी झाडून आत्महत्या केली. यामुळे गेल्या दोन दिवसात सोलापूर जिल्ह्यात खळबळ उडाली आहे. या प्रकरणावरून मीडिया आणि सोशल मीडियात बराच काथ्याकुट होताना दिसतोय. आता हे प्रकरण ताजे असतानाच सोलापूर जिल्ह्यातीलच माढा तालुक्याच्या टेंभुर्णी गावाजवळ असलेल्या वेणेगाव हद्दीतील जय मल्हार लोकनाट्य कला केंद्रात नाच गाण्याची एकत्रित बैठक लावण्याच्या कारणावरून बुधवारी (दि. १०) मध्यरात्री दोन गटात झालेल्या वादातून एकावर गोळीबाराच्या घटनेत गोळी लागून दादा कोठावळे हा तरुण जखमी झाल्याचे प्रकरण घडले असल्याने पुन्हा एकदा सोलापूर जिल्ह्यात खळबळ उडाली आहे. यावरून सोलापूर जिल्ह्यातील कलाकेंद्र जणू गुंडांचा अड्डा बनताहेत अशा चर्चा सध्या सोलापूर जिल्ह्यात सुरू आहेत.
तीन आरोपी अटकेत एक फरार…
याप्रकरणी टेंभुर्णी पोलिसांनी सोन्या उर्फ अविष्कार किशोर शिंदे (२८, रा. कॉलेज समोर, पंढरपूर), अभिषेक दादासाहेब इंगळे (२९, रा. शेगाव दुमाला, हमु. रामबाग पंढरपूर), सूरज उर्फ अंबानी दत्तात्रय पवार (२३, रा. कोर्टी, ता. पंढरपूर) या तिघांना अटक केली. ज्ञानेश्वर उर्फ महाराज पांडुरंग कडलास्कर (रा. व्यास नारायण झोपडपट्टी, अंबाबाई पटांगण पंढरपूर) हा आरोपी फरार आहे. चौघांपैकी गोळी कोणी झाडली व बंदूक कोठून आणली, याचा शोध सुरू असल्याची माहिती पोलिस निरीक्षक नारायण पवार यांनी दिली. कला केंद्रात वादातून वाखरी (ता. पंढरपूर) येथील देवा बाळू कोठावळे (२७) याच्या पायावर गावठी बंदुकीतून गोळी झाडली होती. सर्व आरोपींची नावे समोर आली आहेत. यातील सूरज उर्फ अंबानी पवार, सोन्या उर्फ अविष्कार किशोर शिंदे, अभिषेक इंगळे या तिघांना अटक करून माढा न्यायालयात हजर केले असता तीन दिवसांची पोलिस कोठडी सुनावण्यात आली. यातील सूरजवर सहा गुन्हे असून तडीपारीची कारवाई झाली आहे. सोनू शिंदे याच्यावर २ गुन्हे आहेत. फरार कडलासकर याच्यावर ३ गुन्हे दाखल आहेत सर्व आरोपी गुन्हेगारी पार्श्वभूमीचे असल्याने भविष्यात पंढरपूर शहरात टोळीयुद्धाची शक्यता वर्तवण्यात येत आहे.
बीडच्या उपसरपंचाचा घातपात नसून ती आत्महत्याच…
बीड जिल्ह्यातील गोविंद बर्गे या उपसरपंचाने स्वतःवर गोळी झाडून आत्महत्या केल्याचे प्रकरण घडल्यानंतर त्याच्या कुटुंबीयांनी ही आत्महत्या नसून घातपात असल्याचा आरोप केला आहे. पण शवविच्छेदनानंतर ही आत्महत्या असल्याचा अहवाल सादर करण्यात आला असल्यामुळे बीडच्या उपसरपंचाची आत्महत्याच असल्याचा प्राथमिक अंदाज व्यक्त केला जातोय
