माढा | विशेष प्रतिनिधी :
माढा तालुक्यातील आढेगाव–टाकळी–गार–अकोले–आलेगाव खुर्द–रुई–आलेगाव बुद्र–रांजणी ते राष्ट्रीय महामार्ग क्रमांक 9 ला जोडणाऱ्या प्र.जि.मा. 128 या महत्त्वाच्या रस्त्याच्या कामात कोट्यवधी रुपयांचा घोटाळा सुरू असल्याचा गंभीर आरोप सामाजिक कार्यकर्ते दादासो बबन कळसाईत यांनी केला आहे. मात्र, सार्वजनिक बांधकाम विभागाचे अधिकारी डोळे झाकून बसल्याचा संतापजनक प्रकार उघड झाला आहे.सन 2023–24 साठी तब्बल 30 ते 35 कोटी रुपयांचा निधी मंजूर असतानाही आजपर्यंत केवळ निम्मेच काम करण्यात आले आहे. उर्वरित काम मुद्दाम अपूर्ण ठेवून निकृष्ट दर्जाच्या देखभाल-दुरुस्तीच्या नावाखाली निधी लाटण्याचा प्रकार सुरू असल्याचा आरोप करण्यात आला आहे. नवीन काम पूर्ण न करता जुन्याच कामांवर बिलं काढली जात असल्याचे चित्र स्पष्ट दिसत आहे.
रस्त्याच्या कडेला शेतकऱ्यांनी केलेली अतिक्रमणे हटवण्याची साधी तसदीही प्रशासनाने घेतलेली नाही. उलट साईड पट्ट्यावर दगडांचे ढीग टाकून प्रवाशांचा जीव धोक्यात घालण्यात आला आहे. एखादा मोठा अपघात झाला तर त्यास संपूर्णपणे सार्वजनिक बांधकाम विभाग जबाबदार राहील, असा थेट इशारा देण्यात आला आहे. या सर्व प्रकाराविरोधात संबंधित अधिकाऱ्यांना लेखी तक्रार देण्यात आली असून, आधी अपूर्ण राहिलेले काम तातडीने पूर्ण करा, मंजूर निधीची चौकशी करा आणि दोषींवर कारवाई करा, अशी ठाम मागणी करण्यात आली आहे.
जर प्रशासनाने तात्काळ दखल घेतली नाही, तर दिनांक 19 जानेवारी 2026 रोजी कार्यकारी अभियंता, सार्वजनिक बांधकाम विभाग सोलापूर यांच्या कार्यालयासमोर किंवा टाकळी ग्रामपंचायत कार्यालयासमोर आमरण उपोषण व तीव्र आंदोलन छेडले जाईल, असा थेट संघर्षाचा इशारा देण्यात आला आहे.या आंदोलनाची व तक्रारीची माहिती पोलीस अधीक्षक कार्यालय सोलापूर ग्रामीण, सदर बाजार पोलीस स्टेशन, टेंभुर्णी पोलीस स्टेशन यांनाही देण्यात आली असून, आता अपघात झाला तर प्रशासन जबाबदारी झटकू शकणार नाही, असा संतप्त सूर ग्रामस्थांतून उमटत आहे.
