सोलापूर आजतक न्यूज नेटवर्क
राज्य शासनाच्या मुख्यमंत्री समृद्ध पंचायत राज अभियान अंतर्गत चालू वर्षाचा कर भरून थकबाकीची रक्कम एकाच वेळी भरल्यास निवासी मालमत्ता धारकांना पाणीपट्टी व घरपट्टीच्या थकबाकीवर ५० टक्के सवलत दिली जाणार आहे. या सवलतीचा लाभ गावातील जास्तीत जास्त नागरिकांनी घ्यावा, असे आवाहन नंदेश्वर गावच्या सरपंच सजाबाई दादासाहेब गरंडे यांनी केले आहे.
नंदेश्वर ग्रामपंचायतीच्या वतीने मालमत्ता कर, पाणीपट्टी व दिवाबत्ती कराच्या थकबाकीवर ही ५० टक्के सवलत देण्यात येणार असून, थकबाकीदार नागरिकांनी ३१ डिसेंबरपर्यंत रक्कम भरल्यास या योजनेचा लाभ मिळणार आहे. ग्रामपंचायत हद्दीतील निवासी मालमत्तांवरील कर, पाणीपट्टी व दिवाबत्ती कराच्या थकबाकीवर ही सवलत लागू राहणार आहे.
या सवलतीचा लाभ घेण्यासाठी नागरिकांना चालू आर्थिक वर्ष २०२५–२६ चा संपूर्ण कर एकरकमी भरणे बंधनकारक आहे. तरी नंदेश्वर गावातील जास्तीत जास्त नागरिकांनी थकबाकीसह चालू वर्षाचा कर भरून या सवलतीचा लाभ घ्यावा, असे आवाहन सरपंच सजाबाई गरंडे यांनी केले आहे.
