(सोलापूर आजतक न्यूज नेटवर्क)
जिल्हा परिषद प्राथमिक शाळेत एक धक्कादायक प्रकार समोर आला आहे. रजेचे रोखीकरण का थांबवले, या कारणावरून एका शिक्षकाने थेट मुख्याध्यापकाच्या घरी जाऊन मारहाण केल्याची घटना घडली. या घटनेमुळे शैक्षणिक क्षेत्रात खळबळ उडाली आहे. या प्रकरणी मंगळवेढा पोलिस ठाण्यात गुन्हा दाखल करण्यात आला आहे.
फिर्यादीनुसार, रमेश विष्णू पोतदार (वय ५३, रा. धर्मगाव रोड, तावशी) हे जिल्हा परिषद प्राथमिक शाळा, तावशी येथे मुख्याध्यापक म्हणून कार्यरत आहेत. त्यांच्या शाळेतील शिक्षक सुभाष भोसले (रा. कासेगाव, ता. पंढरपूर) हे नुकतेच सात दिवस अर्जित रजेवर होते.
१२ सप्टेंबर रोजी सकाळी सुमारे ९ वाजता सुभाष भोसले हे पोतदार यांच्या घरी येऊन, “माझ्या रजेचे रोखीकरण का थांबवले?” असे विचारून वाद घालू लागले. त्यानंतर त्यांनी हाताने मारहाण करत शिवीगाळ केली. हा प्रकार पाहून फिर्यादी पोतदार यांच्या पत्नीने मध्यस्थी करण्याचा प्रयत्न केला असता, तिलाही शिवीगाळ करण्यात आल्याचे फिर्यादीत नमूद करण्यात आले आहे.
या प्रकरणी मंगळवेढा पोलिसांनी सुभाष भोसले यांच्याविरुद्ध मारहाणीचा व शिवीगाळीचा गुन्हा नोंदवून पुढील तपास सुरू केला आहे. शाळेतील शिक्षक आणि मुख्याध्यापक यांच्यात झालेल्या या वादामुळे पालकवर्गातही चिंता व्यक्त केली जात आहे. संबंधित शिक्षकावर शिस्तभंगाची कारवाई होणार का, याकडे सर्वांचे लक्ष लागले आहे.
