नंदेश्वर / प्रतिनिधी : नंदेश्वर गावचे पोलीस पाटील संजय गरंडे यांना त्यांच्या उत्कृष्ट कार्याची दखल घेत ‘आदर्श पोलीस पाटील’ पुरस्कार प्रदान करून सन्मानित करण्यात आले. हा पुरस्कार परिविक्षाधीन पोलीस अधीक्षक राहुल आत्राम तसेच सोलापूर ग्रामीणचे उपविभागीय पोलीस अधिकारी संकेत देवळेकर यांच्या हस्ते प्रदान करण्यात आला.
संजय गरंडे यांनी पोलीस पाटील म्हणून काम करताना कायदा व सुव्यवस्था राखणे, पोलिस प्रशासन व नागरिकांमधील समन्वय, गुन्हे प्रतिबंध, तसेच गावातील सामाजिक सलोखा कायम ठेवण्यासाठी उल्लेखनीय योगदान दिले आहे. विविध शासकीय मोहिमांमध्ये सक्रिय सहभाग, तात्काळ माहिती पुरवणे व नागरिकांच्या अडचणी सोडवण्यासाठी केलेले प्रयत्न यामुळे त्यांची निवड या पुरस्कारासाठी करण्यात आली. पुरस्कार वितरणप्रसंगी उपस्थित मान्यवरांनी संजय गरंडे यांच्या कार्याचे कौतुक करून भविष्यातही अशीच समाजोपयोगी सेवा सुरू ठेवण्याच्या शुभेच्छा दिल्या. या कार्यक्रमास पोलीस विभागातील अधिकारी, कर्मचारी तसेच स्थानिक नागरिक मोठ्या संख्येने उपस्थित होते.
