नंदेश्वर / प्रतिनिधी : श्री बाळकृष्ण विद्यालय व कनिष्ठ महाविद्यालय, नंदेश्वर येथील सहशिक्षक नवनाथ पांडुरंग मेटकरी यांना शिक्षक भारती संघटना, जिल्हा सोलापूर यांच्या वतीने देण्यात येणारा प्रतिष्ठेचा जिल्हास्तरीय “सावित्री फातिमा गुणवंत क्रीडा शिक्षक पुरस्कार – २०२६” जाहीर झाला असून, या गौरवामुळे नंदेश्वरसह संपूर्ण शिक्षण व क्रीडा क्षेत्रात आनंदाचे वातावरण निर्माण झाले आहे.
नवनाथ मेटकरी यांनी गेल्या अनेक वर्षांपासून विद्यार्थ्यांच्या सर्वांगीण विकासासाठी क्रीडा क्षेत्रात मोलाचे योगदान दिले आहे. विद्यार्थ्यांमध्ये शिस्त, संघभावना, क्रीडास्पर्धेची वृत्ती व आरोग्याबाबत जागरूकता निर्माण करण्यासाठी त्यांनी सातत्याने प्रयत्न केले. त्यांच्या मार्गदर्शनाखाली अनेक विद्यार्थ्यांनी तालुका, जिल्हा व राज्यस्तरीय क्रीडा स्पर्धांमध्ये उल्लेखनीय यश संपादन केले आहे. ग्रामीण भागातील विद्यार्थ्यांना क्रीडाक्षेत्रात पुढे जाण्यासाठी त्यांनी घेतलेली मेहनत व समर्पण लक्षात घेऊन हा पुरस्कार जाहीर करण्यात आला आहे.
या उल्लेखनीय यशाबद्दल प्रशालेच्या वतीने प्राचार्य विठ्ठल एकमल्ली यांनी नवनाथ मेटकरी यांचे मनःपूर्वक अभिनंदन केले. त्यांनी आपल्या शुभेच्छा संदेशात सांगितले की, “नवनाथ मेटकरी यांचा हा पुरस्कार म्हणजे संपूर्ण शाळेच्या कार्याची पावती असून, त्यांच्या कार्यामुळे शाळेचा नावलौकिक वाढला आहे. त्यांचे कार्य इतर शिक्षकांसाठी प्रेरणादायी आहे.”
या पुरस्काराबद्दल शिक्षकवृंद, शिक्षकेतर कर्मचारी, विद्यार्थी, पालकवर्ग, ग्रामस्थ तसेच विविध सामाजिक, शैक्षणिक व क्रीडा संघटनांकडून नवनाथ मेटकरी यांच्यावर अभिनंदनाचा वर्षाव होत आहे.
