(टीम सोलापूर आजतक)
नंदेश्वरसह जुनोनी, खडकी, गोणेवाडी, शिरशी, खुपसंगी, सिद्धनकेरी, जालीहाळ या आठ गावांचे आर्थिक नाडी असणाऱ्या जिल्हा मध्यवर्ती बँकेचे नंदेश्वर शाखा पुन्हा नव्याने सुरू होण्याच्या अशा पल्लवीत झाल्या आहेत. जिल्हा मध्यवर्ती बँकेचे प्रशासकीय अधिकारी कुंदन भोळे यांनी तसेच संकेत दिले असल्याची माहिती महाराष्ट्र राज्य दूध उत्पादक समितीचे माजी सदस्य आकाश डांगे यांनी दिली आहे. आमदार समाधान आवताडे यांचे मार्गदर्शनाखाली आकाश डांगे यांनी कुंदन भोळे यांची भेट घेत त्यांचे सोबत चर्चा केली आणि आमदार समाधान आवताडे यांचे शिफारस पत्र दिले.
आमदार समाधान आवताडे यांनी दिलेल्या शिफारस पत्रात पंढरपूर-मंगळवेढा विधानसभा मतदार संघातील मौजे नंदेश्वर या गावात असलेली आपल्या बँकेची शाखा ही प्रशासकीय कारणास्तव भोसे ता. मंगळवेढा येथे वर्ग करण्यात आलेली आहे. नंदेश्वर या गावची लोकसंख्या व व्यापार, शेती तसेच शासकीय अनुदान तसेच महिलांना व नागरीकांना विविध योजनांच्या आर्थिक व्यवहारासाठी भोसे येथे जावे लागते. त्यामुळे त्या नागरीकांना नाहक त्रास सहन करावा लागत आहे. त्यामुळे तेथील नागरीकांनी सदरची वर्ग केलेली शाखा पुन्हा नंदेश्वर येथे चालू करण्यासाठी मागणी केली आहे त्याप्रमाणे कार्यवाही होणे गरजेचे आहे. तरी आपल्या नियमाप्रमाणे व नंदेश्वर येथील नागरीकांनी दिलेल्या अर्जाप्रमाणे सदरची वर्ग केलेली शाखा पुन्हा नंदेश्वर येथे चालू करण्यासाठी शिफारस करत असल्याचा उल्लेख करण्यात आला आहे.
नंदेश्वरची शाखा पूर्ववत सुरू करण्यासाठी प्रयत्न…
या संदर्भात कुंदन भोळे यांनी आ.समाधान आवताडे यांनी पाठपुरावा केलेल्या नंदेश्वर येथील शाखेबाबत व अक्कलकोटचे आ.सचिन कल्याणशेट्टी यांच्या दुधनी या गावातील शाखे संदर्भात प्रस्ताव तयार केलेल आहेत. ते प्रस्ताव रिझर्व बँक यांच्याकडे परवानगीसाठी पाठवलेले आहेत अशी माहिती दिली या संदर्भात कायदेशीर बाबी तपासून व जिल्हा बँक अडचणीत असल्याकारणाने रिझर्व बँक कुठल्याही नवीन शाखेला परमिशन देत नाही परंतु मार्च एंडिंगला बँकेच्या एनपीए 3 टक्केच्या आत मध्ये आल्यानंतर मार्चनंतर ही बँक नंदेश्वरसाठी आपण चालू करू अशा प्रकारच आश्वासन दिले असल्याची माहिती आकाश डांगे यांनी यावेळी दिली.
