सोलापूर आजतक न्यूज नेटवर्क
सोलापूर जिल्ह्यात उपमुख्यमंत्री एकनाथ शिंदे यांच्या नेतृत्वाखालील शिवसेनेचे बळ सातत्याने वाढत असल्याचे चित्र दिसत आहे. सांगोला, मैंदर्गी आणि मोहोळ या तीन नगरपालिका थेट धनुष्यबाण चिन्हावर निवडून आल्याने शिंदे गटाची ताकद स्पष्ट झाली आहे. याशिवाय, तीर्थक्षेत्र विकास आघाडीच्या माध्यमातून निवडणूक लढवून जिंकलेल्या पंढरपूर आणि मंगळवेढा नगरपालिकांवरही शिवसेना (शिंदे गट) पदाधिकाऱ्यांनी दावा केला आहे.
पंढरपूर, मंगळवेढावर शिंदे गटाचा दावा
पंढरपूर नगरपालिकेत सत्ता मिळवलेले भगीरथ भालके तसेच मंगळवेढा नगरपालिकेत सत्ताधारी असलेले बबनराव आवताडे आणि सिद्धेश्वर आवताडे यांच्याबाबत शिंदे गटाशी जवळीक असल्याच्या चर्चा असून, यावर त्यांनी आजपर्यंत कोणताही जाहीर नकार दिलेला नाही. विशेष म्हणजे, नगरपालिका निवडणुकीपूर्वी पंढरपूर येथे विठ्ठलाच्या महापूजेसाठी उपमुख्यमंत्री एकनाथ शिंदे आले असताना भगीरथ भालके तसेच बबनराव आवताडे व सिद्धेश्वर आवताडे यांनी त्यांची भेट घेऊन सत्कार केला होता. तेव्हापासून हे नेते शिंदे गटात जाणार असल्याच्या चर्चा सोलापूर जिल्ह्यात सुरू आहेत.
करमाळा नगरपालिकेत जायंट किलर ठरलेले सुनीलबापू सावंत यांनी स्वीकारला आ.तानाजी सावंत यांचा सत्कार
दरम्यान, करमाळा नगरपालिकेत अपक्ष पॅनलच्या माध्यमातून विजय मिळवित जायंट किलर ठरलेले पॅनलप्रमुख सुनीलबापू सावंत यांनी नुकतीच माजी आरोग्यमंत्री आ.तानाजी सावंत यांची भेट घेऊन सत्कार स्वीकारला. या भेटीनंतर करमाळा नगरपालिकेचे सत्ताधिकारीही शिंदे गटात जाणार असल्याच्या चर्चांना उधाण आले आहे.
एकूण सहा नगरपालिकांवर शिंदे गटाचे वर्चस्व???
सध्या धनुष्यबाण चिन्हावर निवडून आलेल्या सांगोला, मैंदर्गी आणि मोहोळ या तीन नगरपालिका, त्यासोबत शिवसेना पदाधिकाऱ्यांचा दावा असलेली पंढरपूर व मंगळवेढा आणि चर्चेत असलेली करमाळा नगरपालिका अशा एकूण सहा नगरपालिकांवर जर एकनाथ शिंदे यांच्या शिवसेनेचे वर्चस्व प्रस्थापित झाले, तर सोलापूर जिल्ह्यात शिंदे गटाची शिवसेना अव्वल ठरेल, अशी जोरदार चर्चा राजकीय वर्तुळात सुरू आहे.
