नंदेश्वर | प्रतिनिधी : भोसे पंचायत समिती गणातून निवडणुकीसाठी काँग्रेस पक्षाकडून दामाजी सलगर यांना अधिकृत उमेदवारी जाहीर करण्यात आली आहे. नंदेश्वर येथील श्री विश्वमाऊली दूध संकलन केंद्राचे चेअरमन म्हणून त्यांनी शेतकरी हितासाठी केलेल्या कार्यामुळे त्यांची संपूर्ण परिसरात वेगळी ओळख निर्माण झाली आहे. दामाजी सलगर यांनी गेल्या अनेक वर्षांपासून नंदेश्वर तसेच आजूबाजूच्या गावांतील शेतकऱ्यांच्या दुधाला योग्य आणि स्थिर दर मिळवून देण्यासाठी सातत्याने प्रयत्न केले आहेत. दूध संकलन, दरवाढीसाठी पाठपुरावा, तसेच शेतकऱ्यांना वेळेवर पेमेंट मिळावे यासाठी त्यांनी प्रभावी व्यवस्थापन उभे केले. यामुळे शेतकरी वर्गात त्यांच्याबद्दल विश्वास आणि आपुलकी निर्माण झाली आहे.
स्वबळावर निवडणुका लढविण्याचा अनुभव
युवकांमध्येही दामाजी सलगर यांची विशेष क्रेझ पाहायला मिळते. सामाजिक उपक्रमांमध्ये त्यांचा सक्रिय सहभाग राहिला आहे. त्यांच्या कार्यशैलीमुळे ते एक अभ्यासू, संपर्कशील आणि काम करणारे नेतृत्व म्हणून ओळखले जात आहेत. याआधी त्यांनी नंदेश्वर ग्रामपंचायतीची निवडणूक अपक्ष म्हणून लढवली होती. त्या निवडणुकीत त्यांनी उल्लेखनीय मते मिळवत आपली स्वतंत्र ताकद सिद्ध केली होती. त्यांचा तो अनुभव आणि जनसंपर्क लक्षात घेता, यावेळी काँग्रेसने त्यांच्यावर विश्वास टाकत उमेदवारी दिली आहे.
दामाजी सलगर यांच्या नावावर एकमत
काँग्रेस पक्षाच्या स्थानिक नेत्यांनी दामाजी सलगर यांच्या नावावर एकमत दर्शवत, भोसे पंचायत समिती गणात पक्षाला बळकटी मिळेल असा विश्वास व्यक्त केला आहे. उमेदवारी जाहीर झाल्यानंतर नंदेश्वर व परिसरातील समर्थकांनी आनंद व्यक्त केला असून, गावागावात प्रचाराची तयारी सुरू झाली आहे. शेतकरी हित, युवकांचे प्रश्न, पाणी, रस्ते व मूलभूत सुविधा यांना प्राधान्य देणार असल्याचे दामाजी सलगर यांनी सांगितले. “सामान्य शेतकरी आणि युवकांच्या प्रश्नांसाठी मी नेहमीच मैदानात राहीन,” असा निर्धार त्यांनी व्यक्त केला. आगामी निवडणुकीत दामाजी सलगर यांची लढत भोसे पंचायत समिती गणात रंगतदार ठरण्याची चिन्हे दिसत असून, काँग्रेसच्या पंजाला किती बळ मिळते याकडे सर्वांचे लक्ष लागले आहे.
