भोसे / विशेष प्रतिनिधी : मंगळवेढा तालुक्यातील भोसे जिल्हा परिषद गटात भाजप उमेदवार प्रदीप खांडेकर यांची राजकीय ताकद दिवसेंदिवस वाढताना दिसत आहे. भाजपच्या वतीने सुरू असलेल्या जोरदार प्रचाराला आता नाथपंथी डवरी समाजाचा जाहीर पाठिंबा मिळाल्यामुळे निवडणुकीच्या रिंगणात खांडेकर यांची स्थिती अधिक मजबूत झाल्याचे चित्र आहे.
नाथपंथी डवरी समाजाच्या प्रमुख पदाधिकाऱ्यांनी व समाजबांधवांनी एकत्र येत प्रदीप खांडेकर यांना पाठिंबा जाहीर केला. या वेळी समाजातील ज्येष्ठ, युवक व महिला मोठ्या संख्येने उपस्थित होते. समाजाच्या सर्वांगीण विकासासाठी, तसेच शिक्षण, रोजगार, पायाभूत सुविधा आणि सामाजिक न्यायासाठी प्रदीप खांडेकर यांचे काम व भूमिका विश्वासार्ह असल्याने हा पाठिंबा देण्यात आल्याचे समाजाच्या वतीने स्पष्ट करण्यात आले.
भाजपच्या माध्यमातून भोसे जिल्हा परिषद गटात विकासाचे नवे पर्व सुरू करण्याचा निर्धार प्रदीप खांडेकर यांनी यापूर्वीच व्यक्त केला आहे. रस्ते, पाणीपुरवठा, आरोग्य, शिक्षण तसेच युवकांसाठी रोजगाराच्या संधी निर्माण करण्यावर भर देण्याचे त्यांनी आश्वासन दिले आहे. त्यांच्या या विकासाभिमुख भूमिकेमुळे विविध समाजघटकांचा त्यांना वाढता पाठिंबा मिळत आहे.
नाथपंथी डवरी समाजाच्या पाठिंब्यामुळे भाजप कार्यकर्त्यांमध्ये नवचैतन्य संचारले असून प्रचाराला अधिक गती मिळाल्याचे पाहायला मिळत आहे. घराघरांत जाऊन संपर्क साधणे, बैठका, प्रचारफेऱ्या यामधून भाजपचा प्रचार अधिक प्रभावीपणे सुरू आहे. भोसे जिल्हा परिषद गटातील निवडणूक आता चुरशीची होत असताना, नाथपंथी डवरी समाजाचा जाहीर पाठिंबा हा प्रदीप खांडेकर यांच्यासाठी महत्त्वाची बाब ठरण्याची शक्यता व्यक्त केली जात आहे. आगामी निवडणुकीत हा पाठिंबा किती निर्णायक ठरतो, याकडे सर्वांचे लक्ष लागले आहे.
