भोसे / विशेष प्रतिनिधी : मंगळवेढा तालुक्यातील सर्वाधिक चर्चेत असलेल्या आणि राजकीयदृष्ट्या महत्त्वाच्या भोसे जिल्हा परिषद गटाचे आज अंतिम चित्र स्पष्ट होणार आहे. आज उमेदवारी अर्ज माघारी घेण्याचा शेवटचा दिवस असल्याने नेमकी किती आणि कोणाची लढत होणार, याकडे संपूर्ण तालुक्याचे लक्ष लागले आहे. चौरंगी, तिरंगी की दुरंगी अशी कोणती निवडणूक रंगणार, याबाबत राजकीय वर्तुळात तर्कवितर्कांना उधाण आले आहे.
भोसे जिल्हा परिषद गटातून विविध पक्षांच्या बलाढ्य उमेदवारांनी उमेदवारी अर्ज दाखल केल्याने ही निवडणूक सुरुवातीपासूनच रंगतदार ठरत आहे. भोसे जिल्हा परिषद गटात भारतीय जनता पक्षाच्या वतीने प्रदीप खांडेकर, तीर्थक्षेत्र विकास आघाडीच्या वतीने बसवराज पाटील, राष्ट्रवादीच्या वतीने दादासाहेब दोलतडे, राष्ट्रवादी शरदचंद्र पवार पक्षाच्या वतीने सिद्धेश्वर रणे, वंचित बहुजन आघाडीच्या वतीने बापूसाहेब मेटकरी यांनीही उमेदवारी दाखल केल्याने बहुकोनी लढतीची शक्यता बळावली आहे.
आज अर्ज माघारीच्या प्रक्रियेत कोणते उमेदवार मैदानात ठाण मांडतात आणि कोण माघार घेतात, यावर अंतिम चित्र अवलंबून आहे. संभाव्य आघाड्या, अंतर्गत चर्चा, वरिष्ठ नेत्यांचे हस्तक्षेप आणि स्थानिक समीकरणे यामुळे शेवटच्या क्षणापर्यंत घडामोडी सुरू राहण्याची शक्यता आहे.
भोसे गट हा मंगळवेढा तालुक्यातील राजकीयदृष्ट्या प्रतिष्ठेचा मानला जातो. त्यामुळे येथील निकालाचा परिणाम आगामी राजकीय समीकरणांवरही होऊ शकतो. आजच्या अर्ज माघारीनंतर स्पष्ट होणाऱ्या चित्रामुळे निवडणूक प्रचारालाही वेग येणार असून, मतदारांमध्ये उत्सुकता शिगेला पोहोचली आहे.
एकूणच आजचा दिवस भोसे जिल्हा परिषद गटासाठी निर्णायक ठरणार असून, कोण बाजी मारणार याची उत्सुकता तालुकाभर कायम आहे.
