नंदेश्वर / प्रतिनिधी
स्वातंत्र्यदिनाचे औचित्य साधून प्रेरणा उद्योग समूहाच्या वतीने जिल्हा परिषद प्राथमिक शाळा, मसनेरवस्ती येथील विद्यार्थ्यांना स्पोर्ट्स किटचे वाटप करण्यात आले. प्रेरणा स्पोर्ट गारमेंटचे मालक बाळासाहेब सलगर यांच्या पुढाकारातून हा उपक्रम राबविण्यात आला. विद्यार्थ्यांच्या शैक्षणिक विकासाबरोबरच त्यांच्या शारीरिक व क्रीडा कौशल्यांना प्रोत्साहन मिळावे, या उद्देशाने स्पोर्ट्स किटचे वाटप करण्यात आले. ग्रामीण भागातील विद्यार्थ्यांना क्रीडा क्षेत्रात आवश्यक साधने उपलब्ध करून देण्यासाठी राबविण्यात आलेल्या या उपक्रमाचे उपस्थित मान्यवरांनी कौतुक केले.
विद्यार्थ्यांना विविध खेळांचा सराव करण्यासाठी होणार उपयोग
यावेळी विद्यार्थ्यांमध्ये मोठा उत्साह पाहायला मिळाला. क्रीडा साहित्यामुळे विद्यार्थ्यांना विविध खेळांचा सराव करण्यास तसेच त्यांच्या क्रीडा कौशल्यांना वाव मिळण्यास मदत होणार आहे. समाजातील विविध घटकांनी विद्यार्थ्यांच्या सर्वांगीण विकासासाठी अशा प्रकारचे उपक्रम राबवावेत, असे मत यावेळी उपस्थित मान्यवरांनी व्यक्त केले.
या कार्यक्रमास दत्तात्रय बिरा सलगर, दिलीप नाना गरंडे, घोरसडे सर, कोकणे सर, तुकाराम दोलतडे, भगवान गरंडे, , शालेय व्यवस्थापन समितीच्या अध्यक्षा दिपालीताई दिलीप गरंडे, उपाध्यक्ष बिरुदेव दोलतडे, माणिक गरंडे, तानाजी गरंडे, सुनील गरंडे, मा. बळक्षेत्री काका, ज्ञानेश्वर गरंडे, इंदाबाई मोटे आदी मान्यवर उपस्थित होते.
विद्यार्थ्यांच्या चेहऱ्यावर आनंद
स्पोर्ट्स किट मिळाल्याने विद्यार्थ्यांच्या चेहऱ्यावर आनंद दिसून आला. शाळेतील शिक्षक, शालेय शिक्षण समिती तसेच पालकांनी प्रेरणा उद्योग समूह, मेजर दत्ता सलगर, बाळासाहेब सलगर यांचे आभार मानत या सामाजिक उपक्रमाचे स्वागत केले.विद्यार्थ्यांच्या उज्ज्वल भविष्यासाठी अशा उपक्रमांची सातत्याने गरज असल्याचेही यावेळी सांगण्यात आले.
