मंगळवेढा (प्रतिनिधी)
मंगळवेढा तालुक्यात भाजपचा मजबूत गड म्हणून ओळख असतानाच आता पुन्हा एकदा भाजपला रोखण्यासाठी समविचारी आघाडीचा नवा प्रयोग सुरू झाल्याची चर्चा राजकीय वर्तुळात जोर धरू लागली आहे. मंगळवेढा येथील खरेदी-विक्री संघाचे चेअरमन सिद्धेश्वर आवताडे यांच्या संपर्क कार्यालयात भाजपच्या विरोधात प्रमुख नेत्यांची बैठक संपन्न झाली. या बैठकीत विविध पक्षांचे नेते, पदाधिकारी आणि कार्यकर्ते एकत्र येऊन भाजपविरोधात एकत्रित लढ्याची भूमिका घ्यावी, असा सूर उमटला असल्याची माहिती मिळत आहे.
मान्यवरांची मांदियाळी..
या बैठकीला माजी पालकमंत्री लक्ष्मणराव ढोबळे, विठ्ठलचे माजी चेअरमन भगीरथ भालके, भैरवनाथ शुगरचे चेअरमन अनिल सावंत,जिल्हा बँकेचे माजी उपाध्यक्ष बबनराव अवताडे,ज्येष्ठ नेते रामभाऊ वाकडे, मुरलीधर दत्तू, खरेदी विक्री संघाचे चेअरमन सिद्धेश्वर आवताडे, कृषी उत्पन्न बाजार समितीचे चेअरमन सुशील आवताडे, काँग्रेसचे तालुकाध्यक्ष प्रशांत साळे, राष्ट्रवादी शरदचंद्र पवार पक्षाचे तालुकाध्यक्ष पांडुरंग चौगुले, सोमनाथ माळी, काँग्रेसचे शहराध्यक्ष राहुल घुले आणि शिवसेना (शिंदे गट) शहराध्यक्ष प्रतिक किल्लेदार यांच्यासह विविध पक्षांचे पदाधिकारी, युवक नेते मोठ्या संख्येने उपस्थित होते.
भगीरथ भालके, अनिल सावंत, बबनराव आवताडे, प्रशांत साळे एकत्रित आल्याने मंगळवेढा तालुक्यातील राजकीय वर्तुळात चर्चा…
या बैठकीचा फोटो सोशल मीडियावर व्हायरल झाल्यानंतर मंगळवेढा तालुक्यात समविचारी आघाडी पुन्हा सक्रिय होत असल्याच्या चर्चा सुरू झाल्या आहेत. काही दिवसांपूर्वी झालेल्या पहिल्या बैठकीत महत्त्वाचे नेते अनुपस्थित होते. मात्र यावेळी भगीरथ भालके, अनिल सावंत, बबनराव अवताडे, काँग्रेसचे तालुकाध्यक्ष प्रशांत साळे यांची उपस्थिती आणि एकत्र येणं राजकीय दृष्ट्या महत्त्वपूर्ण मानलं जात आहे. विशेष म्हणजे, भगीरथ भालके आणि अनिल सावंत यांनी याआधी झालेल्या विधानसभा निवडणुकीत एकमेकांविरोधात एकमेकांविरोधात लढले होते. याचा भाजपला फायदा झाला होता. आता मात्र हे दोन्ही नेते एकत्र आल्याने, तसेच बबनराव आवताडे आणि इतर पक्षांच्या नेत्यांचा पाठिंबा मिळाल्याने ही समविचारी आघाडी भाजपला जोरदार टक्कर देईल, अशी चर्चा तालुक्यात रंगू लागली आहे. राजकीय समीकरणांमध्ये होत असलेल्या या हालचालींमुळे मंगळवेढ्यातील आगामी निवडणुका रंगतदार होण्याची चिन्हे दिसत आहेत.
