भोसे / विशेष प्रतिनिधी : मंगळवेढा तालुक्यातील भोसे जिल्हा परिषद गटातील युवकांसाठी रोजगाराच्या संधी निर्माण करण्याचा ठाम निर्धार राष्ट्रवादी काँग्रेस (शरदचंद्र पवार) पक्षाचे उमेदवार सिद्धेश्वर रणे यांनी व्यक्त केला आहे. युवकांच्या बेरोजगारीच्या प्रश्नावर लक्ष केंद्रित करत, येत्या काळात मार्गदर्शन शिबिरे, प्रशिक्षण उपक्रम तसेच विविध क्षेत्रांशी समन्वय साधून रोजगार उपलब्ध करून देण्याचे सांगितले आहे.
रोजगार संधीसाठी मार्गदर्शन शिबिरे व विशेष शिबिरे आयोजित करणार
सिद्धेश्वर रणे यांनी सांगितले की, आज शिक्षण असूनही अनेक युवक नोकरीपासून वंचित आहेत. ही बाब लक्षात घेऊन युवकांना स्पर्धा परीक्षा, खासगी कंपन्या, आयटी क्षेत्र तसेच विविध स्वयंरोजगाराच्या संधींबाबत मार्गदर्शन देण्यासाठी विशेष शिबिरे राबविण्यात येतील. युवकांमध्ये कौशल्य विकास, आत्मविश्वास निर्माण करणे आणि त्यांना योग्य दिशेने मार्गदर्शन करणे हेच आपले प्रमुख उद्दिष्ट असल्याचे त्यांनी स्पष्ट केले. यापूर्वीही सिद्धेश्वर रणे यांनी अनेक युवकांना नोकरी मिळवून देण्याच्या बाबतीत प्रत्यक्ष मदत केली आहे. त्यांच्या प्रयत्नांमुळे अनेक युवकांना कंपन्या आणि विविध खाजगी संस्थांमध्ये रोजगाराच्या संधी उपलब्ध झाल्या आहेत.
युवकांना रोजगार मिळाला तरच खरा विकास
“राजकारण हे केवळ सत्तेसाठी नसून समाजातील प्रश्न सोडवण्यासाठी असते. युवकांना रोजगार मिळाला तरच गावाचा आणि तालुक्याचा खरा विकास होईल,” असे मत सिद्धेश्वर रणे यांनी व्यक्त केले. त्यांच्या या भूमिकेला युवकांचा मोठा प्रतिसाद मिळत असून, अनेक युवक स्वयंस्फूर्तीने त्यांच्या प्रचारात सहभागी होत आहेत. भोसे जिल्हा परिषद गटात विकासाभिमुख, युवककेंद्री आणि रोजगाराभिमुख नेतृत्वाची गरज असून, सिद्धेश्वर रणे हे त्या अपेक्षा पूर्ण करतील, असा विश्वास स्थानिक नागरिक व्यक्त करत आहेत. आगामी काळात त्यांच्या माध्यमातून युवकांसाठी ठोस आणि दीर्घकालीन रोजगाराच्या संधी निर्माण होतील, अशी आशा व्यक्त केली जात आहे.
