भोसे / विशेष प्रतिनिधी : भोसे जिल्हा परिषद गटात येणाऱ्या आगामी निवडणुकीसाठी राष्ट्रवादी काँग्रेस पक्षाकडून नंदेश्वर येथील श्री बागडेबाबा दूध संस्थेचे चेअरमन दादासाहेब दोलतडे हे निवडणूक रिंगणात उतरले असून, त्यांची तयारी सध्या चर्चेचा विषय ठरत आहे. इतर इच्छुक व उमेदवार उघडपणे प्रचार, बैठकांमधून जोरदार तयारी करताना दिसत असले तरी दादासाहेब दोलतडे यांची हालचाल तुलनेने कमी दिसत असल्याने राजकीय वर्तुळात विविध चर्चांना उधाण आले आहे. मात्र, उपलब्ध माहितीनुसार दोलतडे यांनी गनिमी काव्याने आणि अत्यंत नियोजनबद्ध पद्धतीने तयारी सुरू ठेवली असून योग्य वेळ साधून ताकद दाखवण्याची रणनीती आखली असल्याचे समजते. दादासाहेब दोलतडे यांना राष्ट्रवादी काँग्रेस पक्षाच्या वतीने मोठे पाठबळ मिळणार असल्याची विश्वसनीय माहिती आहे.
राष्ट्रवादीच्या नेत्यांसह मंगळवेढा तालुक्यातील व भोसे जि.प. गटातील अनेक अदृश्यशक्ती करणार मदत
राष्ट्रवादी काँग्रेसचे जिल्हा कार्याध्यक्ष रामेश्वर मासाळ यांच्या माध्यमातून राज्याचे मंत्री ना. दत्तामामा भरणे हे या निवडणुकीकडे विशेष लक्ष ठेवून असल्याचे समजते. तसेच राष्ट्रवादीचे जिल्हाध्यक्ष उमेश पाटील हे देखील या निवडणुकीत सक्रिय भूमिका बजावून दोलतडे यांना महत्त्वपूर्ण मदत करणार असल्याची चर्चा आहे. याशिवाय भोसे जिल्हा परिषद गटातील तसेच मंगळवेढा तालुक्यातील अनेक राजकीय व सामाजिक पातळीवरील अदृश्य शक्ती दादासाहेब दोलतडे यांच्या पाठीशी उभ्या राहणार असल्याची माहिती मिळत आहे. त्यामुळे येत्या काळात या गटातील राजकीय समीकरणे बदलण्याची शक्यता नाकारता येत नाही.
दादासाहेब दोलतडे यांचा गनिमी कावा किती प्रभावी ठरेल याकडे लक्ष
सहकार क्षेत्रात दीर्घ अनुभव, दूध संघाच्या माध्यमातून निर्माण केलेला जनसंपर्क आणि स्थानिक पातळीवरील प्रभाव पाहता दादासाहेब दोलतडे हे भोसे जिल्हा परिषद गटातील एक मजबूत दावेदार मानले जात आहेत. योग्य वेळ साधून प्रचारात उतरण्याची त्यांची रणनीती यशस्वी ठरते का, याकडे सर्वांचे लक्ष लागले आहे. एकूणच भोसे जिल्हा परिषद गटाची निवडणूक रंगतदार व चुरशीची होण्याची चिन्हे असून दादासाहेब दोलतडे यांची गनिमी काव्याने सुरू असलेली तयारी आगामी काळात किती प्रभावी ठरते, हे पाहणे औत्सुक्याचे ठरणार आहे.
