भोसे / विशेष प्रतिनिधी : भोसे प्रादेशिक पाणीपुरवठा योजनेच्या मंजुरी प्रक्रियेत आपण अत्यंत महत्त्वाची भूमिका बजावल्याची माहिती भोसे जिल्हा परिषद गटातील राष्ट्रवादी काँग्रेस (शरदचंद्र पवार) पक्षाचे अधिकृत उमेदवार सिद्धेश्वर रणे यांनी दिली आहे. भोसे जिल्हा परिषद गटातील मतदारांनी मला मतदान का करावे, यामागचे खरे कारण आज प्रथमच सर्वांसमोर मांडत असल्याचे त्यांनी स्पष्ट केले.
सुशीलकुमार शिंदे आणि पृथ्वीराज चव्हाण यांच्या माध्यमातून प्रयत्न
रणे म्हणाले की, तत्कालीन केंद्रीय ऊर्जामंत्री सुशीलकुमार शिंदे आणि तत्कालीन मुख्यमंत्री पृथ्वीराज चव्हाण यांच्या माध्यमातून भोसे प्रादेशिक पाणीपुरवठा योजनेच्या मंजुरीसाठी आपण सातत्याने पाठपुरावा केला. या योजनेला शासनस्तरावर मान्यता मिळवून देण्यात आपली भूमिका अत्यंत महत्त्वाची ठरली, मात्र ही बाब आजपर्यंत आपण कधीही जाहीरपणे सांगितली नव्हती.
भोसे प्रादेशिक पाणीपुरवठा योजनेमुळे सुमारे ४० गावांना शुद्ध पिण्याच्या पाण्याची कायमस्वरूपी सोय उपलब्ध झाली आहे. ही योजना सुरळीत आणि दीर्घकाळ सुरू ठेवण्यासाठी प्रत्येक वेळी शासनदरबारी प्रयत्न करावे लागतात. पण बरेच दिवस झाले ही योजना धुळखात पडली आहे. त्यासाठी सक्षम, अनुभवी आणि सातत्याने पाठपुरावा करणारा लोकप्रतिनिधी भोसे जिल्हा परिषद गटाला मिळणे अत्यंत आवश्यक असल्याचे रणे यांनी सांगितले.
उभारलेल्या उमेदवारांपैकी सर्वसामान्यांचे प्रश्नांसाठी योग्य पाठपुरावा करण्याची क्षमता फक्त माझ्याकडेच – सिद्धेश्वर रणे
या निवडणुकीत उभ्या असलेल्या सर्व उमेदवारांपैकी ही जबाबदारी प्रभावीपणे पार पाडण्याची क्षमता केवळ माझ्यात आहे, असा ठाम दावा त्यांनी केला. भोसे जिल्हा परिषद गटाच्या सर्वांगीण विकासासाठी शासनाकडे योग्य पद्धतीने पाठपुरावा करून निधी आणि योजना आणण्याची ताकद आपल्याकडे असल्याचेही त्यांनी नमूद केले.
भोसे जि. प. गटात प्रश्नच शिल्लक ठेवणार नाही
यावेळी बोलताना रणे यांनी मतदारांना आवाहन केले की, एकदा संधी द्या, भोसे जिल्हा परिषद गटात कोणताही प्रश्न शिल्लक राहू देणार नाही. पाणी, रस्ते, आरोग्य, शिक्षण आणि मूलभूत सुविधांच्या विकासासाठी आपण कटिबद्ध असल्याचे त्यांनी स्पष्ट केले. भोसे जिल्हा परिषद गटाच्या विकासासाठी आपले अनुभव, संपर्क आणि कार्यक्षमता उपयोगी ठरेल, असा विश्वासही त्यांनी व्यक्त केला.
