मंगळवेढा (प्रतिनिधी)
एका २३ वर्षीय तरुणीस लग्नाचे अमिष दाखवून पळवून नेवून तिच्या इच्छेविरुध्द शारिरीक संबंध ठेवून गर्भवती केल्याप्रकरणी समाधान श्रीपती कसबे याच्या विरुध्द मंगळवेढा पोलीसात गुन्हा दाखल झाला आहे.पोलीस सुत्रांकडून मिळालेली माहिती अशी, यातील पिडीतेच्या वडिलाचे दुकान असल्यामुळे ती दुकानावर बसत होती. आरोपी हा येवून काही तरी घेण्याचा बहाना करुन दुकानात येत असे. तू मला खूप आवडतेस माझ्या तुझ्यावर प्रेम आहे असे म्हणत असताना पिडीतेने त्यास साफ नकार दिला होता. तद्नंतर आरोपीने पिडीतेस लग्न करुया असे म्हणाल्यानंतर त्यास पिडीतेने होकार दिला. यावेळी आरोपीने पिडीतेस एक संपर्क साधण्यासाठी छोटा मोबाईलही घेवून दिला. त्यामध्ये सीमकार्ड टाकून दोघांचे एकमेकाशी संभाषण होत असे. एकदा आरोपीने पिडीतेस एका फॉरेस्टमध्ये भेटण्यास बोलावून घेतले.
त्यावेळी आपण लग्न करु असे म्हणून गोड बोलून आरोपीने पिडीतेशी शारीरिक संबंध ठेवले. तद्नंतर अधून मधून सतत फॉरेस्ट मध्ये अनैतिक संबंध ठेवले जात असे. या दरम्यान पिडीतेस मासिक पाळी आली नाही. तिने प्रेग्नंसी चेक केली असता ती गरोदर असल्याचे समजले. यानंतर आरोपीने पिडीतेस आपण पळून जावून लग्न करु असे म्हणाल्यावर दि.६ जुलै २०२५ रोजी सकाळी ९ वाजता फॉरेस्टकडे ये असे सांगितले. पिडीतेने सर्व आवरुन ९.३० वाजता फॉरेस्टकडे गेली, त्यावेळी आरोपी व त्याचा मित्र तेथे उपस्थित होते.
आरोपीने पिडीतेस मोटर सायकलवर बसवून पुढे मिरज येथे नेले. तेथील भोसे गावात आरोपीने त्याचे ओळखीने शेतातील एक खोली भाड्याने घेतली. त्यामध्ये संसार उपयोगी साहित्य ठेवून पिडीतेसह तो राहू लागला. आरोपी ट्रॅक्टर वर ड्रायव्हर म्हणून काम करु लागला. तेथे आरोपी दररोज पिडीतेशी शारिरीक संबंध ठेवत असे, पिडीतेने वारंवार लग्न कधी करायचे? असे विचारल्यावर नंतर करु असे तो म्हणत असे. वारंवार लग्नाचे अमिष दाखवून शारिरीक संबंध ठेवल्याचे तक्रारीत नमूद करण्यात आले आहे. याचा अधिक तपास सहाय्यक पोलीस निरीक्षक लातूरकर हे करीत आहेत. आरोपीला अद्याप अटक झालेली नाही.
