भोसे / विशेष प्रतिनिधी : भोसे जिल्हा परिषद गटातील निवडणुकीत महत्त्वपूर्ण राजकीय घडामोड घडली असून राष्ट्रवादी काँग्रेसकडून उमेदवारी अर्ज दाखल केलेले नंदेश्वर येथील बागडेबाबा दूध संस्थेचे चेअरमन दादासाहेब दोलतडे यांनी अखेर आपला उमेदवारी अर्ज माघारी घेतला आहे. अर्ज माघारी घेण्याच्या शेवटच्या दिवशीच त्यांनी हा निर्णय घेतल्याने निवडणुकीतील गणिते बदलली असल्याची चर्चा राजकीय वर्तुळात सुरू झाली आहे.
मतविभाजन टळले
भोसे जिल्हा परिषद गटात राष्ट्रवादीकडून दादासाहेब दोलतडे तर भाजपकडून प्रदीप खांडेकर हे उमेदवार निवडणूक रिंगणात होते. दोघेही धनगर समाजातील प्रभावी नेते असल्याने या समाजातील मतांचे विभाजन होण्याची शक्यता व्यक्त केली जात होती. मात्र, दादासाहेब दोलतडे यांनी उमेदवारी अर्ज माघारी घेतल्यामुळे संभाव्य मतविभाजन टळले असून त्याचा थेट फायदा भाजपचे उमेदवार प्रदीप खांडेकर यांना होणार असल्याचे बोलले जात आहे.
पक्षांतर्गत चर्चा आणि राजकीय समीकरणांचा विचार करून माघार
दादासाहेब दोलतडे हे नंदेश्वर परिसरात सामाजिक व सहकार क्षेत्रात सक्रिय असून वेगळी ओळख निर्माण केली आहे. मात्र, पक्षांतर्गत चर्चेनंतर व राजकीय समीकरणांचा विचार करता त्यांनी माघार घेण्याचा निर्णय घेतल्याचे समजते. एकूणच दादासाहेब दोलतडे यांच्या माघारीमुळे भोसे जिल्हा परिषद गटातील राजकीय समीकरणे बदलली असून येत्या निवडणुकीत याचा नेमका परिणाम काय होतो, याकडे सर्वांचे लक्ष लागले आहे.
