नंदेश्वर / प्रतिनिधी : नंदेश्वर (ता. मंगळवेढा) : येथील श्री बाळकृष्ण विद्यालय या दहावीच्या परीक्षा केंद्रावर मूळ विद्यार्थ्यांऐवजी तोतया विद्यार्थी बसवून परीक्षा देण्याचा गंभीर प्रकार उघडकीस आला आहे. या प्रकरणी मंगळवेढा पोलीस ठाण्यात २० जणांविरुद्ध गुन्हा दाखल करण्यात आला असून त्यापैकी १० जणांना अटक करण्यात आली आहे. न्यायालयाने या आरोपींना २४ फेब्रुवारीपर्यंत चार दिवसांची पोलीस कोठडी सुनावली आहे.
तपासादरम्यान धक्कादायक प्रकार उघड
पोलीस सूत्रांनी दिलेल्या माहितीनुसार, केंद्र संचालक विठ्ठल एकमल्ली यांची दहावी बोर्डाच्या परीक्षेसाठी महाराष्ट्र राज्य माध्यमिक व उच्च माध्यमिक शिक्षण मंडळ, पुणे यांच्याकडून नियुक्ती करण्यात आली होती. परीक्षा सुरळीत पार पाडण्याची जबाबदारी केंद्र संचालकांवर असून त्यासाठी २५ पर्यवेक्षक शिक्षकांची नियुक्ती करण्यात आली होती. दि. २० फेब्रुवारी रोजी सकाळी ११ वाजता पेपर सुरू झाल्यानंतर विद्यार्थ्यांच्या हॉलतिकीट व शाळेच्या ओळखपत्रांची तपासणी करण्यात येत असताना हा प्रकार उघड झाला. परीक्षा यादीप्रमाणे पडताळणी करताना काही विद्यार्थ्यांच्या ओळखीत तफावत आढळून आली.
विविध वर्गांमध्ये तोतया विद्यार्थी आढळले
तपासणीदरम्यान खालीलप्रमाणे प्रकार समोर आले —
परीक्षा क्रमांक C 262502 असलेल्या रोहित चौधरी यांच्या नावावर विश्वजीत उर्फ बाबू चव्हाण परीक्षा देताना आढळला.
प्रज्योत जाधव यांच्या नावावर वैभव पवार, राकेश कुंभार यांच्या नावावर सचिन बोधगिरे, मंगेश कदम यांच्या नावावर प्रकाश अडळगी, तुकाराम थोरवे यांच्या नावावर समाधान रुपनर, भक्ती जोशी यांच्या नावावर प्रिती बिराजदार, निखिल पाटील यांच्या नावावर आकाश पाटील, प्रतिक मंडले यांच्या नावावर प्रकाश बिराजदार, श्रीकांत सावंत यांच्या नावावर धर्मात्मा आझाद, शुभम जांगळे यांच्या नावावर रोहित बांदल परीक्षा देताना आढळून आले. काही तोतया विद्यार्थ्यांकडे हॉलतिकीट किंवा ओळखपत्र नव्हते, तर काहींकडे बनावट शिक्के मारलेली हॉलतिकीटे आढळली.
बनावट शिक्क्यांचा वापर
तपासादरम्यान मिळालेल्या हॉलतिकिटांवर सुतार इंटरनॅशनल स्कूल अँड ज्यु. कॉलेज असा रबरी शिक्का मारलेला असल्याचे दिसून आले. काही हॉलतिकिटांवर निळ्या रंगाचा बनावट शिक्का होता. एका आरोपीकडून हॉलतिकिटाची झेरॉक्स प्रतही जप्त करण्यात आली आहे. एसएससी बोर्डाच्या ऑनलाईन संकेतस्थळावर तपासणी केली असता हॉलतिकिटांमधील माहिती व प्रत्यक्ष बसलेले विद्यार्थी यांच्यात मोठी तफावत आढळून आली.
आरोपी बाहेरच्या जिल्ह्यांतील
तपासात समोर आलेल्या माहितीनुसार, हे तोतया विद्यार्थी कोल्हापूर, सांगली व बेळगाव परिसरातील असून सर्वजण १८ वर्षांवरील आहेत. या प्रकरणामागे संघटित टोळी कार्यरत असल्याचा संशय पोलिसांनी व्यक्त केला आहे.
पुढील तपास सुरू
सहाय्यक पोलीस निरीक्षक लातुरकर यांच्या मार्गदर्शनाखाली तपास सुरू असून उर्वरित आरोपींना लवकरच ताब्यात घेण्यात येणार असल्याचे सांगण्यात आले. या प्रकारामुळे शिक्षण क्षेत्रात खळबळ उडाली असून परीक्षा प्रक्रियेच्या सुरक्षिततेबाबत गंभीर प्रश्न निर्माण झाले आहेत. या प्रकरणाचा सखोल तपास करून संपूर्ण रॅकेटचा पर्दाफाश करण्याचे आव्हान पोलिसांसमोर उभे आहे.
