मंगळवेढा/ प्रतिनिधी
सोलापूर जिल्ह्यातील सर्वाधिक लक्षवेधक ठरलेल्या पंढरपूर-मंगळवेढा विधानसभा मतदारसंघात तुतारीचा उमेदवार कोण असणार यावर उत्कंठा शिगेला पोहोचली होती. अखेर अगदी अंतिम टप्प्यात भैरवनाथ शुगरचे व्हा.चेअरमन अनिल सावंत यांना राष्ट्रवादी शरदचंद्र पवार पक्षाचा एबी फॉर्म मिळून तुतारीचे ते अधिकृत उमेदवार बनले आहेत. पंढरपूर-मंगळवेढा विधानसभा मतदारसंघात अगदी सुरुवातीपासूनच सामाजिक कार्यात अग्रेसर असलेला अनिल सावंत यांच्यासारखा तगडा उमेदवार मिळाल्याने राष्ट्रवादीच्या कार्यकर्त्यांमध्ये पर्यायाने संपूर्ण मतदारसंघात कार्यकर्त्यांचा उत्साह वाढल्याचे चिन्ह तयार झाले आहेत. पंढरपूर आणि मंगळवेढा तालुक्यातील राष्ट्रवादी शरदचंद्र पवार पक्षाचे मुख्य पदाधिकारी कार्यकर्ते यांनी प्रचाराला सुरुवात देखील केली आहे. तसेच महाविकास आघाडीतील मुख्य दोन घटक पक्ष असलेल्या काँग्रेस आणि शिवसेना उद्धव बाळासाहेब ठाकरे या दोन्ही पक्षातील कार्यकर्त्यांमध्ये देखील उत्साह संचारला आहे. दोन्ही पक्षातील पदाधिकारी देखील अनिल सावंत यांच्या प्रचारात सहभागी होताना दिसत आहेत.
निवडणुका जाहीर झाल्यापासून व तसेच त्याआधी दृष्टिक्षेपात असल्यापासून पंढरपूर मंगळवेढा विधानसभा मतदारसंघात इच्छुक असलेले माजी आमदार प्रशांत परिचारक, विठ्ठलचे माजी चेअरमन भगीरथ भालके, भैरवनाथ शुगरचे व्हा. चेअरमन अनिल सावंत हे ज्यावेळी गाव भेट दौऱ्याच्या निमित्ताने गावोगावी गेले त्यावेळी लोकांनी व तसेच इच्छुक असलेल्या सर्व नेत्यांच्या कार्यकर्त्यांनी सुद्धा त्यांना तुतारी या चिन्हावर निवडणूक लढविण्याचे आवाहन केले होते. यानुसार सगळ्यांनीच प्रयत्न सुरू ठेवले होते. अनिल सावंत हे पहिल्यापासूनच राष्ट्रवादी काँग्रेस पार्टीकडून निवडणूक लढवण्यासाठी इच्छुक होते. फक्त इच्छुक न राहता त्यांनी प्रयत्नही सुरू ठेवले होते.
साम दाम दंड भेद अशा सर्वच बाजूने सक्षम असलेले व तसेच सामाजिक कार्यात अग्रेसर असलेले अनिल सावंत हे महायुतीचे अधिकृत उमेदवार विद्यमान आमदार समाधान आवताडे यांना तगडी टक्कर देऊ शकतात अशी सध्या चर्चा मतदारसंघात होत आहे.
