पंढरपूर / प्रतिनिधी : पंढरपूर नगरपरिषदेतील राजकारणाला नवे वळण लागण्याची चिन्हे स्पष्ट दिसू लागली आहेत. विठ्ठल परिवाराचे नेते भगीरथ भालके यांच्यावर नाराज असलेल्या नगरसेवकांच्या गटाने थेट शिंदेसेनेचे आमदार तानाजी सावंत यांची भेट घेतल्याने शहरातील राजकीय घडामोडींना वेग आला आहे. विशेष म्हणजे ही भेट भालके यांना पूर्णपणे वगळून पार पडली, यामुळे अंतर्गत मतभेद अधिकच उघड झाले आहेत.
भालके यांनी शिंदेसेनेत प्रवेश करण्याबाबत स्थानिक कार्यकर्त्यांची मते जाणून घेण्यासाठी बैठक आयोजित केली होती. मात्र, तीर्थक्षेत्र विकास आघाडीच्या नगरसेवकांनी या बैठकीकडे पाठ फिरवली. गटनेते नागेश भोसले यांनीही “आमचा गट स्वतंत्र आहे” असे स्पष्ट करत भालके यांना उघड आव्हान दिले होते.
दरम्यान, तीर्थक्षेत्र विकास आघाडीचे अध्यक्ष सुधीर धुमाळ, नगरसेवक संजय बंदपट्टे, प्रसाद कळसे, अक्षय गंगेकर, किरण घाडगे, सुधीर धोत्रे आणि धनंजय धोत्रे यांनी आमदार तानाजी सावंत यांची भेट घेतली. ही भेट भैरवनाथ शुगर उद्योग समूहाचे अध्यक्ष अनिल सावंत यांच्या पुढाकाराने घडवून आणण्यात आली. नागेश भोसले आजारी असल्याने या भेटीस उपस्थित राहू शकले नाहीत.
या बैठकीत नगरसेवकांनी स्पष्ट भूमिका मांडली की, “आम्ही भालके यांच्यासोबत शिंदेसेनेत जाणार नाही. मात्र, आम्ही स्वतंत्रपणे तुमच्यासोबत येण्यास तयार आहोत. आमच्या प्रभागाच्या विकासासाठी स्वतंत्र निधी मिळावा,” अशी मागणी त्यांनी आमदार सावंत यांच्याकडे केली. यावर निधीबाबत कोणतीही अडचण येणार नसल्याचे आश्वासन सावंत यांनी दिल्याची माहिती सूत्रांकडून मिळाली आहे.
सध्या नगरपरिषदेत नगराध्यक्षपदी प्रणिता भालके विराजमान असल्या, तरी भाजप आणि परिचारक गटाचे अधिक नगरसेवक निवडून आल्यामुळे सत्तेचा समतोल भालके यांच्या विरोधात आहे. परिणामी, नगरपरिषदेतील कामकाज सुरळीत पार पाडताना त्यांना अनेक अडचणींचा सामना करावा लागत आहे. या पार्श्वभूमीवर, राज्यातील सत्ताधारी एकनाथ शिंदे यांच्या नेतृत्वाखालील शिवसेनेत प्रवेश करून निधी आणि राजकीय पाठबळ मिळवण्याचा भालके यांचा प्रयत्न सुरू आहे. या प्रयत्नांमध्ये त्यांचे काका आणि भैरवनाथ शुगर उद्योग समूहाचे अध्यक्ष अनिल सावंत सक्रिय भूमिका बजावत आहेत. आमदार तानाजी सावंत यांच्या माध्यमातून हा प्रवेश सुलभ करण्याचा त्यांचा प्रयत्न असल्याचे बोलले जात आहे.
त्याचवेळी, तीर्थक्षेत्र विकास आघाडीचे नगरसेवक भालके यांच्यापासून पूर्णपणे दुरावू नयेत आणि स्थानिक पातळीवर एकजूट टिकून राहावी, यासाठीही अनिल सावंत यांनी मध्यस्थीची भूमिका घेतल्याचे दिसून येते. गुरुवारी झालेली ही भेट त्याचाच भाग असल्याचे राजकीय वर्तुळात चर्चिले जात आहे. एकूणच, पंढरपूर नगरपरिषदेतील सत्तासमीकरणे झपाट्याने बदलत असून, आगामी काळात शहराच्या राजकारणात आणखी नाट्यमय घडामोडी होण्याची शक्यता व्यक्त केली जात आहे.
