नंदेश्वर / प्रतिनिधी : मंगळवेढा तालुक्यातील राजकीयदृष्ट्या अत्यंत चर्चेत असलेल्या भोसे जिल्हा परिषद गट आणि भोसे पंचायत समिती गणासाठी उमेदवारी अर्ज दाखल करण्याच्या प्रक्रियेला चांगलाच वेग आला असून, या निवडणुकीत अनेक प्रस्थापित व नवोदित उमेदवार रिंगणात उतरल्याने राजकीय वातावरण तापले आहे. भोसे जिल्हा परिषद गटामधून दामाजी सहकारी साखर कारखान्याचे संचालक भिवा दोलतडे यांचे सुपुत्र दादासाहेब दोलतडे यांनी आपला उमेदवारी अर्ज दाखल केला आहे. विशेष म्हणजे जिल्हा परिषद गटासाठी सध्या नंदेश्वर गावातून दादासाहेब दोलतडे यांचा एकमेव अर्ज दाखल झाला आहे.
दरम्यान, भोसे पंचायत समिती गणातून नंदेश्वर गावातील चार प्रमुख उमेदवारांनी आपले अर्ज दाखल केले आहेत. यामध्ये नंदेश्वरचे माजी सरपंच अनिल गरंडे, जिल्हा परिषदेच्या माजी महिला व बालकल्याण सभापती रतन मेटकरी यांचे सुपुत्र व शिक्षक नेते ज्ञानेश्वर मेटकरी यांचे पुत्र प्रवीण मेटकरी, तसेच नंदेश्वर येथील विश्वमाऊली दूध उत्पादक संस्थेचे चेअरमन दामाजी सलगर यांचा समावेश आहे. भोसे जिल्हा परिषद गटावर गेल्या अनेक वर्षांपासून नंदेश्वर येथील उमेदवारांचे वर्चस्व राहिले आहे. मात्र यावेळच्या निवडणुकीत नंदेश्वरकरांनी जिल्हा परिषद गटापेक्षा पंचायत समिती गणाला अधिक पसंती दिल्याचे चित्र स्पष्ट होत आहे.
