टीम सोलापूर आजतक
पंढरपूर-मंगळवेढा विधानसभा मतदार संघामध्ये महाविकास आघाडीचा उमेदवार कोण याबाबत गेल्या अनेक दिवसांपासून चर्चा तर्कवितर्क बांधले गेले आहेत. यामध्ये सुरुवातीला माजी आमदार प्रशांतराव परिचारक, विठ्ठलचे माजी चेअरमन भागीरथ भालके, भैरवनाथ शुगरचे व्हा.चेअरमन अनिल सावंत या तिघांची प्रामुख्याने नावे आघाडीवर होती. नुकताच प्रशांत परिचारक आणि आमदार समाधान आवताडे यांच्यातील वाद मिटुन त्यांच्यात समेट झाला असल्यामुळे प्रशांत परिचारक स्पर्धेतून बाहेर गेले आहेत. यानंतर भगीरथ भालके आणि अनिल सावंत यांच्यात स्पर्धा सुरू आहे. पण पंढरपूर-मंगळवेढा विधानसभा मतदारसंघात महाविकास आघाडीचा पर्यायाने राष्ट्रवादी तुतारीचा उमेदवार देताना खा.पवार हे अगदी सुरुवातीपासून नवीन चेहरा देणार असल्याचे संकेत देत आले आहेत. त्यामुळे अनिल सावंत यांनाच उमेदवारी मिळेल असा अंदाज वर्तविला जात आहे.
माजी आ. प्रशांत परिचारक आणि आमदार समाधान आवताडे यांच्यातील वाद मिटवून भाजपने मोठा गेम खेळला आहे. त्यामुळे शरद पवार हे धक्का तंत्राचा वापर करीत आहेत पण ते अगदी शांत डोक्याने करीत असल्याच्या चर्चा सध्या होत आहेत. याशिवाय माढा विधानसभा मतदारसंघातून विधान परिषदेचे आमदार रणजीतसिंह मोहिते-पाटील यांना उमेदवारी देण्याची माहिती मिळत आहे.
