(टीम सोलापूर आजतक)
जिल्हा परिषद, पंचायत समिती : आरक्षण नियमावली प्रसिद्ध
जिल्हा परिषद गट व पंचायत समिती गणाच्या आरक्षण सोडतीसाठी चक्रानुक्रम पद्धत वापरली जाते. आरक्षणाची पद्धत व चक्रानुक्रम निश्चित करण्यासाठी ग्रामविकास विभागाने नवीन नियम तयार केले आहेत. या नियमांचे राजपत्र २० ऑगस्टला प्रसिद्ध झाले आहे. येत्या काळात घेण्यात येणारी जिल्हा परिषद व पंचायत समितीची सार्वत्रिक निवडणूक ही या नव्या नियमानुसार जागांच्या चक्रानुक्रमासाठी पहिली निवडणूक समजली जाणार आहे.
ग्रामविकास विभागाच्या राजपत्रामुळे गट, गणाच्या एससी व ओबीसी आरक्षणाची सुरवात पहिल्यापासून होण्याची शक्यता आहे. जिल्हा परिषद व पंचायत समितीची अंतिम गट/ गण रचना आज प्रसिद्ध झाली. ही प्रभागरचना अंतिम होण्यापूर्वीच ग्रामविकास विभागाने चक्रानुक्रमाची नवी नियमावली आणली आहे. या निवडणुकीसाठी अनुसूचित जाती /जमाती, नागरिकांचा मागास प्रवर्ग व सर्वसाधारण महिला आरक्षण कसे काढावे, याचे नियम सांगितले आहेत. सोडतीची नियमावली प्रसिद्ध झाली आहे.
प्रत्यक्ष आरक्षण सोडत कधी निघणार, याबद्दल कमालीची उत्सुकता निर्माण झाली आहे. ऑगस्ट अखेरपर्यंत गट व गणांसाठी प्रत्यक्ष आरक्षण सोडत काढली जाईल, सप्टेंबरमध्ये प्रत्यक्ष निवडणूक प्रक्रिया सुरू होईल, अशी दाट शक्यता व्यक्त होत आहे.
* १९९६ ची नियमावली झाली रद्द *
महाराष्ट्र जिल्हा परिषदा आणि पंचायत समित्या (जागांच्या आरक्षणाची पद्धत व चक्रानुक्रम) नियम १९९६ चा वापर केला जात होता. आरक्षणासाठी शासनाने नवी नियमावली करताना १९९६ ची ही नियमावली रद्द केली आहे. तब्बल ३० वर्षांनंतर आरक्षणासाठी नवी नियमावली आल्याने या प्रक्रियेत आणि जुन्या प्रक्रियेत नक्की काय बदल केले जाणार, याकडे सर्वांचे लक्ष असणार आहे.
* २०१७ मधील गटांच्या आरक्षणाची स्थिती *
१) अनुसूचित जमाती (१): गोपाळपूर (ता. पंढरपूर)
२) अनुसूचित जाती (१०) : केम, पेनूर, वेळापूर, वळसंग. महिला : नातेपुते, जवळा, कडलास, हुलजंती, बोरामणी
३) सर्वसाधारण महिला (२०) : पांडे, वीट, कोर्टी, भोसरे, उपळाई बु., बेंबळे, पानगाव, दारफळ बीबी, कुरुल, करकंब, दहिगाव, मांडवे, संग्रामनगर, अकलूज, बोरगाव, निमगाव, मंद्रूप, चपळगाव, नागणसूर, सलगर
४) नागरिकांचा मागास प्रवर्ग (१८) : उपळे दुमाला, मालवंडी, कामती बु., रोपळे, म्हाळुंग, पिलीव, घेरडी, कुंभारी, वागदरी. महिला : टेंभुर्णी, पांगरी, वैराग, वाखरी, भाळवणी, टाकळी, यशवंतनगर, लक्ष्मी दहिवडी, भंडारकवठे.
५) सर्वसाधारण (१९): वांगी, मानेगाव, कुई, मोडनिंब, उपळाई ठोंगे, नान्त्रज, आष्टी, अनगर, नरखेड, कासेगाव, महूद बु., एखतपूर, नाझरे, कोळा, संत दामाजीनगर, भोसे, हत्तूर, जेऊर, मंगरूळ.
