(सोलापूर आजतक न्यूज नेटवर्क)
जमिनीची नोंद धरण्यावरून महसूल यंत्रणेकडून झालेल्या त्रासाला वैतागून नंदेश्वरच्या समाधान मोटे या युवक शेतकऱ्याने तलाठी व मंडल अधिकाऱ्याचे नाव व्हाट्सअप स्टेटसला ठेवत मंगळवेढ्यातील तहसील कार्यालयात अंगावर डिझेल ओतून पेटवून घेण्याचा प्रयत्न केला. सुदैवाने महसूलच्या कनिष्ठ कर्मचाऱ्यांच्या सतर्कतेमुळे ही घटना टळली.याबाबत सविस्तर हकीकत अशी, नंदेश्वर मधील समाधान मोटे या शेतकऱ्याच्या खरेदीची नोंद महसूल यंत्रणांकडून रद्द करण्यात आली. ज्या कारणास्तव रद्द करण्यात आले. त्यातील दुरुस्ती शेतकऱ्याने करण्याचा प्रयत्न केला. त्यानंतर त्या संदर्भातील नोंद घेण्यास तलाठी व मंडल अधिकाऱ्यांनी टाळाटाळ केल्यावरून संबंधित शेतकऱ्याने आज दु. 3 दरम्यान मंगळवेढा तहसील कार्यालयात अंगावर तेल ओतून पेटवून आत्महत्या करण्याचा प्रयत्न केला. परंतु, महसूल मधल्या कनिष्ठ कर्मचाऱ्यांच्या सतर्कतेमुळे ही दुर्दैवी घटना टळली.
महसूल मंडल अधिकाऱ्याकडून शेतकऱ्याला प्रत्येक गोष्टीसाठी नाहक त्रासाला सामोरे जावे लागते. कोणत्याही कारणास्तव नोंद करत असताना काहीतरी कारण सांगून नोंद प्रलंबित ठेवणे आणि त्यांच्या नेमलेल्या झिरो हस्तकामार्फत अर्थपूर्ण व्यवहार झाल्यानंतर ती नोंद प्रमाणित करण्याचे प्रकार सुरू आहेत.
परंतु याकडे महसूच्या वरिष्ठ अधिकाऱ्यांनी सोयीस्करित्या दुर्लक्ष केल्यामुळे यापूर्वी दोन वेळा मंडळ अधिकाऱ्याला लाच प्रकरणात अटक झाली आहे. तरी देखील महसूल यंत्रणा याकडे गांभीर्याने पाहत नाही आज शेवटी संतप्त झालेल्या शेतकऱ्याने आपल्या त्रासाला तलाठी व मंडल अधिकारी जबाबदार असून आपण त्यांच्या त्रासाला कंटाळून आत्महत्या करत असल्याचा व्हाट्सअप स्टेटस ठेवून आत्महत्या करण्याचा प्रयत्न केला. दरम्यान आजच्या घटनेनंतर यामध्ये दोषी कोण आहेत याबाबत प्रांत अधिकारी तहसीलदार यांनी सखोल चौकशी करावी अशी मागणी या निमित्ताने पुढे येत आहे.
प्रकरणाची सखोल चौकशी करून न्याय मिळवून देण्यास कटीबद्ध – खासदार प्रणिती शिंदे
दरम्यान खासदार प्रणिती शिंदे यांनी नंदेश्वरचे शेतकरी समाधान मोटे यांच्याशी फोनवरून संवाद साधत तुमचा जो प्रश्न आहे तो आपण कायदेशीर मार्गाने मार्गी लावू. तुम्ही आत्महत्या करण्याचा प्रयत्न करू नका मी लवकरात लवकर तुमची भेट घेते. आणि संबंधित सर्व कर्मचाऱ्यांना या प्रकरणा संदर्भात जाब विचारून तुम्हाला न्याय मिळवून देते असा शब्द दिला.
