(सोलापूर आजतक न्यूज नेटवर्क)
बेकायदा मुरूम उपसा रोखण्यासाठी गेलेल्या महिला पोलीस उपाधीक्षकांना ‘मैं डीसीएम अजित पवार बोल रहा हु. कारवाई बंद करो, मेरा आदेश है’म्हणत कारवाई बंद करण्याचे उपमुख्यमंत्री अजित पवार यांनी आदेश दिले. आणि त्यांचा फोन नंबर घेऊन मी तुम्हाला वैयक्तिक बोलतो असे म्हणाले.
माढा तालुक्यातील कुर्डू गावात अवैध मुरूम उत्खननाविरोधात कारवाईसाठी गेलेल्या करमाळा विभागाच्या पोलिस उपअधीक्षक अंजली कृष्णा आणि उपमुख्यमंत्री अजित पवार यांच्यातील फोन संभाषण व व्हिडीओ कॉल प्रकरण सध्या प्रसार माध्यमात जोरदार चर्चेत आहे. या घटनेचा व्हिडीओ सोशल मीडियावर व्हायरल झाला आहे. कुर्डू गावात रस्त्यासाठी सुरू असलेल्या मुरूम उत्खननाच्या तक्रारीनंतर पोलिस उपअधीक्षक अंजली कृष्णा घटनास्थळी पोहोचल्या. यावेळी स्थानिक ग्रामस्थांसोबत त्यांची शाब्दिक चकमक झाली. या दरम्यान बाबा जगताप यांनी थेट उपमुख्यमंत्री अजित पवारांना फोन लावून कृष्णा यांच्या हातात दिला. फोनवरून पवारांनी स्वतःची ओळख करून देत कारवाई थांबविण्याचे आदेश दिले. मात्र, अंजली कृष्णा यांनी त्यांचा आवाज ओळखला नाही. त्यावर पवारांनी नाराजी व्यक्त करत ‘मैं डीसीएम अजित पवार बोल रहा हु. कारवाई बंद करो, मेरा आदेश है’ असे सांगितले.
बेकायदा मुरूम उपसा करणाऱ्यांवर व पोलिसांशी वाद घालणाऱ्या गुंडांवर गुन्हा दाखल करा – अतुल खूपसे-पाटील
दरम्यान शेतकरी नेते अतुल खूपसे-पाटील यांनी या प्रकरणावर प्रकाश टाकत राज्याचे मुख्य असणारे अवैध धंद्यांना पाठीशी घालत आहेत असा आरोप केला. बीड जिल्ह्यातील गुन्हेगारी प्रवृत्ती रोखण्यासाठी ज्या अजित पवारांना पालकमंत्री केले आहे ते अजित पवार बीड जिल्ह्यातील गुन्हेगारी तर रोखू शकले नाहीत मात्र ते सोलापूर जिल्ह्याचा बीड करत आहेत असा आरोप केला. तसेच सदर प्रकरणातील ज्यांनी बेकायदा मुरुप उपसा केला त्यांच्यावर गुन्हा दाखल झाला नाही. तसेच त्यांनी बेकायदा मुरूम उपसा रोखण्यासाठी आलेल्या पोलिसांना दमबाजी करत त्यांच्याशी वाद घातला आहे अशा सर्वांवर येत्या आठ दिवसात गुन्हा दाखल झाला नाही तर सोलापूर येथील जिल्हाधिकारी कार्यालयासमोर आंदोलन करणार असल्याचा इशारा दिला आहे.
