नंदेश्वर / प्रतिनिधी : खडकी (ता. मंगळवेढा) परिसरात नुकत्याच घडलेल्या अत्यंत दुर्दैवी घटनेमुळे संपूर्ण तालुक्यावर शोककळा पसरली आहे. सरपण आणण्यासाठी गेलेल्या आईसह तिच्या दोन लहान मुलांचा साठवण तलावात बुडून मृत्यू झाल्याची हृदयद्रावक घटना तीन दिवसांपूर्वी उघडकीस आली होती. या घटनेने परिसरात हळहळ व्यक्त होत असून, घोडके कुटुंबावर दुःखाचा डोंगर कोसळला आहे.
आर्थिक मदत करत शैक्षणिक खर्चासाठी देखील मदत
या पार्श्वभूमीवर भैरवनाथ शुगर उद्योग समूहाचे चेअरमन अनिल सावंत यांनी खडकी येथे भेट देत घोडके कुटुंबियांचे सांत्वन केले. त्यांनी कुटुंबीयांना धीर देत आर्थिक मदतही प्रदान केली. तसेच, घोडके कुटुंबातील स्वप्निल घोडके याचा पुढील शैक्षणिक खर्चासाठी मदत करणार असल्याचे त्यांनी यावेळी जाहीर केले. त्यांच्या या संवेदनशील आणि दानशूर भूमिकेचे ग्रामस्थांकडून कौतुक होत आहे. मंगळवेढा तालुक्यात ज्या ज्या ठिकाणी अशा प्रकारच्या दुर्दैवी घटना आजपर्यंत घडल्या आहेत तिथे प्रत्येक ठिकाणी पोहोचत अनिल सावंत यांनी मदत केली आहे. अनिल सावंत यांच्या या कृतीचे मंगळवेढा तालुक्यातून कौतुक होत आहे.
या भेटीदरम्यान सखाराम बेलदार, ह.भ.प. सुदर्शन महाराज, हौसाप्पा शेवडे, संभाजी मस्के, युवराज बंडगर, बाबुराव ठोंबरे, परमेश्वर लेंडवे, पंकज चव्हाण, गणेश रणदिवे यांच्यासह खडकीतील अनेक ग्रामस्थ उपस्थित होते. सर्वांनी मिळून घोडके कुटुंबियांच्या दुःखात सहभागी होत त्यांना धीर देण्याचा प्रयत्न केला.
