नंदेश्वर (प्रतिनिधी) खोटे-नाटे बोलून लोकांना फसविणे हे माझ्या स्वभावात बसत नाही. मी आजपर्यंत सर्वसामान्यांच्या दुःखात सहभागी होऊन त्यांना सहकार्य करण्याची भूमिका घेतली आहे. अगदी पदरमोड करून मी माझ्या पद्धतीने प्रत्येकाला न्याय देण्याचा प्रयत्न केला आहे. अगदी अशाच प्रकारे पंढरपूर-मंगळवेढा विधानसभा मतदारसंघातील मतदारांनी माझ्यावर विश्वास ठेवून जर मला विधानसभेत जायची संधी दिली तर या मतदारसंघाला मी महाराष्ट्रात विकासाचा मॉडेल बनवून दाखवतो असे प्रतिपादन महाविकास आघाडीचे अधिकृत उमेदवार आणि सावंत यांनी केले. मंगळवेढा येथील सांगता प्रचार सभेत सावंत बोलत होते. यावेळी व्यासपीठावर माजी मंत्री लक्ष्मणराव ढोबळे राष्ट्रवादीचे नेते राहुल शहा, चंद्रशेखर कोंडूभैरी, संतोष रंधवे, शिवसेना शहरप्रमुख दत्तात्रय भोसले, काँग्रेसचे फिरोज मुलाणी, माजी उपनगराध्यक्ष मुजफर काझी, माजी नगरसेवक चंद्रशेखर कोंडूभैरी, कार्याध्यक्ष संतोष रंधवे, तालुकाध्यक्ष प्रथमेश पाटील, सेवानिवृत्त प्राचार्य साहेबराव पवार, जेष्ठ नेते दादासाहेब गरंडे, राजाभाऊ चेळेकर, महिला नेत्या संगीता कट्टे, मरवडेचे माजी सरपंच दादासाहेब पवार यांचेसह महाविकास आघाडीच्या घटक पक्षांचे विविध पदाधिकारी व मतदार मोठ्या संख्येने उपस्थित होते. प्रचार सभा सुरू होण्याआधी मंगळवेढा शहरातून काढलेल्या प्रचार रॅलीला उत्स्फूर्त असा प्रतिसाद मिळाला.
यावेळी बोलताना सावंत म्हणाले की, आजपर्यंत या मतदारसंघाला अनेक लोकप्रतिनिधी लाभले आहेत. पण दोन्ही तालुक्यात म्हणावा तसा विकास आज हे नागरिकांना बघायला मिळत नाही. अगदी गेल्या 20-30 वर्षापासून लोकांचे जे प्रश्न होते आजही ते तसेच रखडले आहेत. माझी काम करण्याची पद्धत खूप वेगळी आहे. मी एखादा विषय हातात घेतल्यानंतर तो विषय जोपर्यंत मार्गे लागत नाही तोपर्यंत त्याचा पाठपुरावा सोडत नाही. त्यामुळे मतदारांनी एक वेळ मला संधी द्यावी असेही आवाहन यावेळी सावंत यांनी बोलताना केले.
चौकट
मंगळवेढा येथील श्री संत दामाजी कारखान्याच्या निवडणुकीपासून चर्चेत असलेले समविचारी आघाडीचे निमंत्रक आणि मंगळवेढा येथील बळीराजा पतसंस्थेचे चेअरमन दामोदर देशमुख यांनी अनिल सावंत यांना पाठिंबा दिला. याशिवाय शेतकरी संघटनेचे युवक प्रदेशाध्यक्ष अमोगसिद्ध काकणकी यांनीही सावंत यांना पाठिंबा दिला. शेतकऱ्यांविषयी एक तळमळ असलेला नेता म्हणून आम्ही अनिल सावंत यांना पाठिंबा देत असल्याचे दामोदर देशमुख आणि अमोगसिद्ध काकणकी स्पष्ट केले.
