नंदेश्वर (प्रतिनिधी) मंगळवेढा तालुक्यातील नंदेश्वर गावचे सुपुत्र तथा श्री संत दामाजी महाविद्यालय मंगळवेढा येथे कार्यरत शारीरिक शिक्षण व क्रीडा संचालक प्रा. गणेश जोरवर-पाटील यांना पुण्यश्लोक आहिल्यादेवी होळकर सोलापूर विद्यापीठ सोलापूर यांच्यातर्फे उत्कृष्ट संघ प्रशिक्षक म्हणून कुलगुरू डॉ.प्रा.प्रकाश महानवर यांच्या हस्ते गौरवण्यात आले.भारताचे महान हॉकीपटू मेजर ध्यानचंद यांचा जन्मदिवस राष्ट्रीय क्रीडा दिन म्हणून साजरा करण्यात येतो.
त्यानिमित्ताने क्रीडा क्षेत्रात भरीव कामगिरी करणाऱ्या क्रीडा शिक्षकांकरिता विद्यापीठाच्या वतीने पारितोषिक वितरण समारंभ आयोजित करण्यात आले होते. त्यामध्ये पुण्यश्लोक अहिल्यादेवी होळकर सोलापूर विद्यापीठ सोलापूर मा कुलगुरू प्रा.प्रकाश महानवर यांच्या हस्ते उत्कृष्ट क्रीडा संघ प्रशिक्षक म्हणून ब्लेझर व सन्मानचिन्ह देऊन गौरविण्यात आले यावेळी प्रमुख उपस्थिती प्रा. लक्ष्मीकांत दामा, प्र.कुलसचिव डॉ अतुल लकडे, वित्त व लेखाधिकारी महादेव खराडे व इतर मान्यवर उपस्थित होते.
प्रा. गणेश जोरवर-पाटील यांनी मंगळवेढा तालुक्याच्या दक्षिण भागातील नंदेश्वर गावासह परिसरातील अनेक गावांमध्ये फायटर स्पोर्ट्स क्लबच्या माध्यमातून खेळाला एक वेगळे वैभव प्राप्त करून दिले आहे. दरवर्षी ते फायटर स्पोर्ट्स क्लब च्या माध्यमातून क्रिकेट स्पर्धा तसेच इतर खेळांच्या स्पर्धांचे आयोजन करतात.
