अश्रू अनावर,हृदयस्पर्शी व्याख्यान, नंदेश्वर येथे श्री मलुआई देवी यात्रेनिमित्त वसंत हंकारे यांनी व्याख्यानात मानवी जीवनात आई-वडिलांचे महत्त्व दिले पटवून..

नंदेश्वर /प्रतिनिधी
प्रत्यक्षात परमेश्वर कोणीच पाहिला नाही पण मुलांच्या जडणघडणीसाठी, भविष्यासाठी रात्रीचा दिवस करून जे झटतात ते आई-वडीलच खरे आपले देव आहेत. त्यामुळे जिवंतपणे साक्षात परमेश्वराची भेट घेण्यासाठी इतरत्र न फिरता आपल्या आई-वडिलांमध्ये ज्यांनी देव शोधला तेच खरे जन्माने माणूस म्हणून शोभले असे प्रतिपादन महाराष्ट्रातील सुप्रसिद्ध व्याख्याते वसंत हंकारे यांनी केले.

नंदेश्वर (ता.मंगळवेढा) येथे श्री मलुआई देवी यात्रेनिमित्त वसंत हंकारे यांचे व्याख्यान संपन्न झाले यावेळी ते बोलत होते. कार्यक्रमाचे उद्घाटन राष्ट्रवादी शरदचंद्र पवार पक्षाचे जिल्हाध्यक्ष वसंत देशमुख यांचे हस्ते शिवसेना शिंदे गटाचे सोलापूर जिल्हा सहसंपर्कप्रमुख महेश साठे, काँग्रेसचे तालुकाध्यक्ष प्रशांत साळे, माजी सभापती प्रदीप खांडेकर,माजी जि.प.सदस्य नामदेव जानकर, शिवसेना तालुकाप्रमुख अशोक चौंडे, मनसेचे तालुकाध्यक्ष धनाजी गडदे, श्री बाळकृष्ण विद्यालय व जुनिअर कॉलेजचे प्राचार्य विठ्ठल एकमल्ली, माऊली सोसायटीचे चेअरमन भारत गरंडे, महाराष्ट्र राज्य दूध उत्पादक समितीचे माजी सदस्य आकाश डांगे,दादासाहेब पवार, पांडुरंग चौगुले यांच्या प्रमुख उपस्थितीत करण्यात आले.

यावेळी बोलताना हंकारे म्हणाले की, आज कॉलेज तरुण तरुणींच्यामध्ये दुर्दैवाने प्रेम प्रकरणांची संख्या वाढताना दिसत आहे. आणि हे युवक-युवती इतक्यावरच न थांबता सैराट होताना दिसत आहेत. यामुळे ज्यांनी वयाची वीस पंचवीस वर्षे आपल्या मुलांना तळहाताच्या फोडाप्रमाणे जपले त्या आई-वडिलांना मात्र पोलीस ठाण्याच्या चकरा माराव्या लागत आहेत. यासारखे मोठे दुर्दैव आई-वडिलांच्या नशिबी दुसरे कोणतेच नाही.आई-वडिलांना जिवंतपणी या नरक यातना न देता मुलांनी त्यांच्या विचार करून यापासून लांब राहणे गरजेचे आहे.

यावेळी बोलताना अशोक चौंडे म्हणाले की, नंदेश्वर गावात आम्ही श्री मलुआई देवीची यात्रा गेल्या बारा वर्षापासून सातत्याने अत्यंत चांगले कार्यक्रम राबवित करीत आहोत. गेल्या दोन वर्षापासून मात्र आम्ही एक रुपयांचीही कोणाकडून वर्गणी न घेता कार्यक्रम राबवत आहोत. यापुढेही दर्जेदार आणि समाज प्रबोधनपर कार्यक्रम करत राहणार आहोत.

यावेळी धनश्री मल्टीस्टेटचे संचालक रामचंद्र बंडगर, पोलीस पाटील संजय गरंडे,माजी उपसरपंच राहुल कसबे, आप्पासाहेब मेटकरी, श्री माऊली पतसंस्थेचे चेअरमन आण्णासाहेब बंडगर, नानासाहेब बंडगर, पोपट बंडगर, आबासाहेब पाटील, मुकुंद व्हरगळ हे उपस्थित होते. कार्यक्रमाचे प्रास्ताविक शिवसेना तालुकाप्रमुख अशोक चौंडे यांनी केले. सूत्रसंचालन औदुंबर कुंभार यांनी केले तर शेवटी आभार प्रदर्शन नवनाथ मेटकरी यांनी केले.

उपस्थित सर्वांनाच अश्रू अनावर
वसंत हंकारे यांच्या व्याख्यानाचा कार्यक्रम नंदेश्वर येथील श्री बाळकृष्ण विद्यालयात संपन्न झाला. बाळकृष्ण विद्यालयातील विद्यार्थी व तसेच गावातील मान्यवर महिला पुरुषांनी यावेळी मोठी गर्दी केली होती. मानवी जीवनात आई-वडिलांचे महत्त्व या नाजूक विषयावर वसंत हंकारे यांनी केलेल्या हृदयस्पर्शी व्याख्यानाने उपस्थित असलेल्या विद्यार्थी विद्यार्थिनींना व तसेच पालक मान्यवर या सर्वांनाच अश्रू अनावर झाल्याचे दिसले. व्याख्यानाच्या शेवटी उपस्थित असलेल्या पालकांना त्यांच्या मुलांनी मारलेल्या मिठीचा क्षण मात्र भाव खाऊन गेला.