नंदेश्वर / प्रतिनिधी : भाजपा युवा मोर्चाचे प्रदेशाध्यक्ष कृष्णराज महाडिक यांच्या स्वागतासाठी मंगळवेढा भाजप युवा मोर्चाकडून उत्साहपूर्ण तयारी करण्यात आली. मंगळवेढा नगरपालिकेचे नगरसेवक सोमनाथ आवताडे यांच्या प्रमुख उपस्थितीत भाजप युवा मोर्चाचे तालुकाध्यक्ष आकाश डांगे यांनी पंढरपूर येथे जाऊन कृष्णराज महाडिक यांचे स्वागत केले. त्यानंतर सोलापूर येथेही महाडिक यांच्या स्वागतासाठी तयारी करण्यात आली होती.
मंगळवेढा तालुका भाजपा युवा मोर्चाची संघटनात्मक कार्यकारणी लवकरच जाहीर होणार – आकाश डांगे
या भेटीदरम्यान मंगळवेढा भाजप युवा मोर्चाच्या संघटनात्मक बांधणीसंदर्भात महत्त्वपूर्ण चर्चा पार पडली. आगामी काळात युवा मोर्चाची ताकद अधिक मजबूत करण्याच्या दृष्टीने मंगळवेढा तालुका कार्यकारिणीची नावे निश्चित करण्यात आली. ही नावे आमदार समाधान आवताडे यांच्या मार्गदर्शनाखाली तयार करण्यात आली असून ती अधिकृत मान्यतेसाठी कृष्णराज महाडिक यांच्याकडे सुपूर्द करण्यात आल्याची माहिती आकाश डांगे यांनी यावेळी दिली.
यावेळी तालुकाध्यक्ष आकाश डांगे यांनी मंगळवेढा तालुक्यात भाजप युवा मोर्चामार्फत सुरू असलेल्या विविध संघटनात्मक कार्याची माहिती प्रदेशाध्यक्ष महाडिक यांना दिली. युवकांमध्ये पक्षाची विचारधारा पोहोचविणे, गावपातळीवर युवा कार्यकर्त्यांचे जाळे मजबूत करणे, तसेच आगामी निवडणुकांच्या पार्श्वभूमीवर संघटन बळकट करण्यासाठी सुरू असलेल्या प्रयत्नांची सविस्तर माहिती त्यांनी मांडली.
कृष्णराज महाडिक यांची कौतुकाची थाप
कृष्णराज महाडिक यांनीही मंगळवेढा तालुक्यातील युवा मोर्चाच्या कार्याचे कौतुक करत आगामी काळात युवकांनी अधिक जोमाने पक्ष संघटन वाढीसाठी काम करावे, असे आवाहन केले. लवकरच भाजप युवा मोर्चा मंगळवेढा तालुका कार्यकारिणी अधिकृतरीत्या जाहीर करण्यात येणार असल्याने कार्यकर्त्यांमध्ये उत्साहाचे वातावरण निर्माण झाले आहे.
