नंदेश्वर / प्रतिनिधी : नंदेश्वर परिसरातील युवकांसाठी प्रेरणादायी ठरलेल्या शिरणांदगी येथील रकमाजी जकु पडवळे यांची महाराष्ट्र लोकसेवा आयोगामार्फत (MPSC) घेण्यात आलेल्या पोलीस उपनिरीक्षक विभागीय मर्यादित स्पर्धा परीक्षेत (PSI) निवड झाल्याबद्दल फायटर स्पोर्ट्स क्लब नंदेश्वर यांच्या वतीने त्यांचा भव्य सत्कार करण्यात आला.
रकमाजी पडवळे यांनी पोलीस दलातील कर्तव्य सांभाळत सातत्यपूर्ण अभ्यास करून हे यश संपादन केले आहे. सन 2016 मध्ये ते मुंबई पोलीस दलात भरती झाले होते. तब्बल 9 वर्षांची सेवा बजावत असताना त्यांनी जिद्द, मेहनत आणि चिकाटीच्या जोरावर पोलीस उपनिरीक्षक पद मिळविले आहे. त्यांच्या या यशामुळे परिसरात आनंदाचे वातावरण निर्माण झाले असून युवकांमध्ये प्रेरणा निर्माण झाली आहे.
सदर PSI विभागीय मर्यादित स्पर्धा परीक्षेची पूर्व परीक्षा डिसेंबर 2023 मध्ये, मुख्य परीक्षा डिसेंबर 2024 मध्ये तर मैदानी परीक्षा एप्रिल 2026 मध्ये पार पडली होती. या परीक्षेचा अंतिम निकाल 20 मे 2026 रोजी जाहीर करण्यात आला असून त्यामध्ये रकमाजी पडवळे यांनी यश संपादन केले. यावेळी आयोजित सत्कार समारंभात फायटर स्पोर्ट्स क्लबचे अध्यक्ष प्रा. गणेश जोरवर-पाटील यांनी रकमाजी पडवळे यांच्या मेहनतीचे कौतुक करत युवकांनी त्यांच्याकडून प्रेरणा घ्यावी, असे आवाहन केले. उपस्थित मान्यवरांनीही त्यांच्या जिद्दीचे आणि कर्तव्यनिष्ठेचे अभिनंदन केले.
या कार्यक्रमास लक्ष्मण बंडगर, माजी ग्रामपंचायत सदस्य भारत कळकुंबे, काशलिंग गरंडे, विराज जोरवर, सागर करे, अनिकेत लाड, दादा जोरवर, रोहित पवार, तन्वीर आत्तार, जनार्धन सलगर, शैलेश कळसे, शशांक दोलतडे, सुदर्शन बंडगर, यश कळसे, दत्ता माळी, शाम लोहार, रोहित गरंडे, बिरूदेव बंडगर, दया खांडेकर, योगेश बंडगर, अमोल कांबळे तसेच परिसरातील मित्रमंडळी मोठ्या संख्येने उपस्थित होती. कार्यक्रमाचा शेवट उपस्थितांच्या शुभेच्छा व अभिनंदनपर संदेशांनी उत्साहपूर्ण वातावरणात झाला.
