नंदेश्वर | प्रतिनिधी : मंगळवेढा तालुक्यातील नंदेश्वर गावात येत्या दोन ते तीन महिन्यांत ग्रामपंचायत निवडणूक होण्याची शक्यता असून, त्याच्या पार्श्वभूमीवर गावातील राजकीय वातावरण चांगलेच ढवळून निघाले आहे. विशेष म्हणजे नंदेश्वर ग्रामपंचायतीच्या इतिहासात प्रथमच सरपंच पदाची निवड थेट जनतेतून होणार असल्याने या निवडणुकीकडे संपूर्ण गावाचे लक्ष लागले आहे.
थेट जनतेतून सरपंच निवड होणार असल्यामुळे इच्छुक उमेदवारांनी आतापासूनच मोर्चेबांधणी सुरू केली आहे. गावातील विविध राजकीय गटांमध्ये बैठका, चर्चासत्रे आणि रणनीती आखण्याचे काम सुरू असून, गावातील राजकीय समीकरणे झपाट्याने बदलताना दिसत आहेत.
भावी सरपंच, सदस्यांचे स्टेटस झळकू लागले
सध्या सोशल मीडियावर ‘भावी सरपंच’, ‘भावी सदस्य’ तसेच विविध प्रभागांतील संभाव्य उमेदवारांचे पोस्टर मोठ्या प्रमाणावर झळकू लागले आहेत. त्यामुळे निवडणुकीची रंगत दिवसेंदिवस वाढत असून, गावात प्रचाराचे वातावरण आधीच निर्माण झाले आहे.
गावातील मतदारांमध्येही यंदाच्या निवडणुकीबाबत मोठी उत्सुकता असून, विकासाच्या मुद्द्यांवर कोण उमेदवार जनतेसमोर विश्वासार्ह भूमिका मांडतो याकडे सर्वांचे लक्ष लागले आहे. अनेक तरुणांनीही निवडणुकीत सक्रिय सहभाग घेण्यास सुरुवात केल्याने यंदाची निवडणूक अधिक चुरशीची होण्याची शक्यता वर्तवली जात आहे.
अधिकृत निवडणूक कार्यक्रम जाहीर नसला तरी घडामोडींना वेग
दरम्यान, अधिकृत निवडणूक कार्यक्रम अद्याप जाहीर झालेला नसला तरी गावातील राजकीय हालचालींना वेग आला असून, आगामी काळात नंदेश्वर ग्रामपंचायतीची निवडणूक ही तालुक्यात चर्चेचा विषय ठरणार असल्याचे चित्र दिसत आहे.
