मंगळवेढा / विशेष प्रतिनिधी : सोलापूर जिल्ह्यातील मंगळवेढा तालुक्यातून एक अत्यंत धक्कादायक आणि मन हेलावून टाकणारी घटना समोर आली आहे. इंस्टाग्राम रिल्सच्या माध्यमातून अल्पावधीतच महाराष्ट्रभर लोकप्रिय झालेली २५ वर्षीय विवाहित रील स्टार रोहिणी निलेश पाराध्ये हिने आत्महत्या केल्याची दुर्दैवी घटना घडली असून, या घटनेने सोशल मीडियावरील तिचे लाखो चाहते, स्थानिक नागरिक आणि संपूर्ण परिसरात हळहळ व्यक्त केली जात आहे.
मंगळवेढा तालुक्यातील ब्रह्मपुरी येथे असलेल्या प्रसिद्ध ‘हॉटेल ग्रामपंचायत’मध्ये मंगळवारी दुपारी साडेदोनच्या सुमारास ही घटना घडली. मिळालेल्या माहितीनुसार, सोमवार हा हॉटेलचा साप्ताहिक सुट्टीचा दिवस असल्याने मंगळवारीदेखील हॉटेल उघडण्यात आले नव्हते. याच दरम्यान रोहिणी पाराध्ये हिने हॉटेलच्या स्वयंपाकघरातील पत्र्याच्या लोखंडी अँगलला दोरीच्या सहाय्याने गळफास घेत आत्महत्या केल्याचे समोर आले आहे. घटनेची माहिती मिळताच नातेवाईक आणि स्थानिकांनी तातडीने तिला मंगळवेढा येथील ग्रामीण रुग्णालयात दाखल केले. मात्र डॉक्टरांनी तपासणीअंती तिला उपचारापूर्वीच मृत घोषित केले. या घटनेनंतर परिसरात मोठी खळबळ उडाली असून, मंगळवेढा पोलीस ठाण्यात अकस्मात मृत्यूची नोंद करण्यात आली आहे.
आंतरजातीय प्रेमविवाहातून सुरू झाला संसार
नातेवाईकांनी दिलेल्या माहितीनुसार, रोहिणी आणि तिचे पती निलेश पाराध्ये यांचा आंतरजातीय प्रेमविवाह झाला होता. विशेष म्हणजे रोहिणीचा हा दुसरा विवाह असल्याचेही समोर आले आहे. विवाहानंतर हे दाम्पत्य काही काळ पुणे येथे वास्तव्यास होते. त्याच काळात त्यांनी सोशल मीडियावर रिल्स बनवण्यास सुरुवात केली होती.
यानंतर ते मूळ गावी परतल्यानंतर त्यांनी ‘हॉटेल ग्रामपंचायत’ हा व्यवसाय सुरू केला. हॉटेलमधील दैनंदिन कामकाज, ग्राहकांशी होणारे विनोदी संवाद, पारंपरिक खाद्यपदार्थ आणि ग्रामीण जीवनशैलीवर आधारित रिल्समुळे हे दाम्पत्य सोशल मीडियावर प्रचंड लोकप्रिय झाले होते. त्यांच्या व्हिडिओंना हजारो-लाखो व्ह्यूज मिळत होते. या लोकप्रियतेचा त्यांच्या व्यवसायालाही मोठा फायदा झाला होता.
यशाच्या शिखरावर असतानाच टोकाचे पाऊल
व्यवसायात यश, सोशल मीडियावर प्रसिद्धी आणि कौटुंबिक संसार सुरळीत सुरू असल्याचे चित्र असतानाच रोहिणीने अचानक इतके टोकाचे पाऊल का उचलले, हा प्रश्न सर्वांनाच पडला आहे. आत्महत्येमागे कौटुंबिक वाद, मानसिक तणाव किंवा इतर कोणते कारण होते का, याचा तपास आता पोलीस करत आहेत. घटनेनंतर सोशल मीडियावर अनेक तर्कवितर्क लावले जात असून, तिच्या चाहत्यांकडून हळहळ व्यक्त केली जात आहे. अनेकांनी तिच्या रिल्सची आठवण काढत श्रद्धांजली वाहिली आहे.
पोलिसांकडून सखोल तपास सुरू
या प्रकरणी मंगळवेढा पोलीस ठाण्यात ADR (Accidental Death Report) दाखल करण्यात आला असून, पोलीस प्रशासनाने नातेवाईक, मित्रपरिवार आणि संबंधित व्यक्तींची चौकशी सुरू केली आहे. आत्महत्येमागचे नेमके कारण शोधण्यासाठी पोलिसांकडून सर्व बाजूंनी तपास सुरू असल्याची माहिती मिळत आहे.
